სასჯელაღსრულების სამინისტროს ინფორმაციით, გლდანში მოშიმშილე პატიმრების ჯანმრთელობის მდგომარეობა დამაკმაყოფილებელია.

ამის შესახებ უწყების მიერ გავრცელებულ განცხადებაშია ნათქვამი.

„სასჯელაღსრულებისა და პრობაციის სამინიტრო გლდანის N8 პენიტენციურ დაწესებულებაში მოშიმშილე მსჯავრდებულებთან/ბრალდებულებთან დაკავშირებით აცხადებს, რომ ყველა მათგანის ჯანმრთელობის მდგომარეობა ამ ეტაპზე დამაკმაყოფილებელია და მათ სათანადო სამედიცინო მომსახურება უტარდებათ.

სასჯელაღსრულებისა და პრობაციის სამინისტრო აცხადებს, რომ მოშიმშილე მსჯავრდებულები/ბრალდებულები სხვადასხვა მუხლების საფუძველზე იმყოფებიან პატიმრობაში და მათი პროტესტი კონკრეტული საქმეებიდან გამომდინარეობს.

მოშიმშილეების ნაწილი არ აღიარებს ბრალს, მოითხოვს სამართლიანი სასამართლოს ჩატარებას, ნაწილი - საქმის გადახედვას, ნაწილი კი პარლამენტის ადამიანის უფლებებისა და სამოქალაქო ინტეგრაციის კომიტეტის თავმჯდომარე ეკა ბესელიასთან შეხვედრას ითხოვს“, - ნათქვამია განცხადებაში.