ე.წ. კორტების სპეცოპერაციის საქმეში ბრალდებული ირაკლი ფირცხალავას ადვოკატი პროცესის გაჭიანურებასთან დაკავშირებით ბრალდების მხარის ადვოკატის გაგი მოსიაშვილის განცხადებას პასუხობს.

დავით ხაჟალიას თქმით, მას მსგავსი მეთოდებით სასამართლო განხილვები არასწოდეს უწარმოებია.

„გაგი მოსიაშვილის დღევანდელ პრესკონფერენციასთან დაკავშირებით მინდა განვაცხადო, რომ დაცვის მხარე, არასდროს არ აპირებდა და არც აპირებს მოცემულ საქმეზე, რაიმე ფორმით საპატიმრო ვადით მანიპულირებას, მიუხედავად იმისა, რომ ბრალდების მხარისაგან გასხვავებით დაცვის მხარეს მხოლოდ ერთი თვე დარჩა საკუთარი პოზიციებისა და მტკიცებულებების წარმოსადგენად.

სასამართლო სხდომაზე ჩვენ სასამართლო ჩავაყენეთ საქმის კურსში, რომ დაცვის მხარე უბრალოდ ვერ ახერხებდა იმ მოწმე პოლიციელების წარმოდგენას, რომლებიც დღესაც მუშაობენ შინაგან საქმეთა სამინისტროს სისტემაში.

ყოველივე ზემოაღნიშნულიდან გამომდინარე, გაგი მოსიაშვილის მიერ დღეს, პრესკონფერენციაზე გაჟღერებული პოზიცია მოკლებულია რეალობას და მიმართულია საზოგადოების არასწორი ინფორმირებისაკენ“, - განაცხადა დავით ხაჟალიამ.

ვაზაგაშვილის ოჯახის ადვოკატი ე.წ. კორტების სპეცოპერაციის საქმეზე დაცვის მხარეს პროცესის განზრახ გაჭიანურებაში ადანაშაულებს.

როგორც მოსიაშვილმა დღეს გამართულ ბრიფინგზე განაცხადა, ამის მიზეზი ის არის, რომ დაკავებულებს წინასწარი პატიმრობის ვადა ამოეწუროთ და გათავისუფლდნენ.