"დადგენილია ყველა გარემოება" - შოთაძე ბიზნესმენ ბესიკ ხარძიანის მკვლელობაზე

სამართალი - 17:59, 02 Oct, 2015

4302

მთავარი პროკურორის მოადგილემ ირაკლი შოთაძემ ქართველ ჟურნალისტებთან საუბრისას დღეს საკუთარ სახლთან დღემდე დაუდგენელი პირის მიერ მოკლული ბიზნესმენის, ბესიკ ხარძიანის საქმის გამოძიებაზე ისაუბრა.

პროკურატურის მაღალჩინოსანი აცხადებს, რომ "ფაქტობრივად დადგენილია ყველა გარემოება, თუ როგორ მოხდა ბესიკ ხარძიანის მკვლელობა".

"ძალიან ბევრი ფაქტობრივი გარემოებაა დადგენილი, თუმცა ამ ეტაპზე თავს შევიკავებთ დეტალებზე საუბრისგან, ვინაიდან მიმდინარეობს ოპერატიულ-სამძებრო ღონისძიებები. საზოგადოებას რომ ვაცნობო კონკრეტულად რა არის საქმეში დადგენილი, ვინ არიან მხილებულნი, ეს ხელს შეუშლის ღონისძიებების მიმდინარეობას, თუმცა მინდა გითხრათ, რომ ბესიკ ხარძიანის ოჯახი სრულად არის ინფორმირებული საქმეში მიმდინარე საგამოძიებო მოქმედებებისა და ოპერატიულ-სამძებრო ღონისძიებების შესახებ", - განაცხადა ირაკლი შოთაძემ.

მთავარი პროკურორის მოადგილეს დღეს კითხერს, გამოკვეთილია თუ არა მკვლელობის მოტივი, რაზეც მან აღნიშნა, რომ "ყველაფერი გამოკვეთილია" თუმცა ის ამ საკითხზე ამ ეტაპზე დამატებით კომენტარს ვერ გააკეთებს.

გარდა ხარძიანის მკვლელობისა შოთაძემ გახმაურებულ საქმეებზეც ისაუბრა. ირაკლი შოთაძე რაფალიანცის, თათუხაშვილისა და კიწმარიშვილის საქმეებზე საპარლამენტო კომისიის შესაძლო შექმნის საკითხს გამოეხმაურა და აღნიშნა, რომ აღნიშნული პარლამენტის კომპეტენციაა.
"თითოეულ ამ საქმეზე ჩატარებულია ყველა საჭირო საგამოძიებო მოქმედება. თათუხაშვილის გარდაცვალების საქმეზე წინასწარი გამოძიება შეწყდა დანაშაულის ნიშნების არარსებობის გამო. ამ საქმის მთელი მასალები შესაძლებელია პარლამენტის კომისიისთვის ხელმისაწვდომი გახდეს და თვითონვე შეუძლიათ გაეცნონ ამ მტკიცებულებებს. რაც შეეხება რაფალიანცის საქმეს, გამოძიება მიმდინარეობს. ეროსი კიწმარიშვილის საქმესთან დაკავშირებით უახლოეს პერიოდში პროკურატურა საქმის დეტალებს გაასაჯაროებს, რაც ყველა კითხვას პასუხს გასცემს",- აღნიშნა შოთაძემ.