საქალაქო სასამართლოში „რუსთავი 2“-ის საქმეზე მოსამზადებელი სხდომა უნდა დაიწყოს. ტელეკომპანიის ადვოკატები პროცესის გადადების მოთხოვნით სასამართლოს დღეს კიდევ ერთხელ მიმართავენ. აღნიშნული მოთხოვნით დაცვის მხარემ სასამართლოს უკვე მიმართა. მათი განმარტებით, ამის მიზეზი არის ის, რომ სხდომას მოპასუხე მხარე - ტელეკომპანიის გენერალური დირექტორი და ადვოკატი ვერ დაესწრებიან. თუმცა მოსამართლემ ადვოკატების შუამდგომლობა არ დააკმაყოფილა.

„წინა სხდომაზე ნიკა გვარამიამ და ადვოკატმა თამთა მურადაშვილმა განაცხადეს, რომ ვერ შეძლებდნენ სხდომაზე დასწრებას. თამთა მივლინებაში იმყოფება. მაინც ჩანიშნა მოსამართლემ სხდომა. ჩვენ ვერ გავმართავთ ამ სხდომას თუ მთავარი მოპასუხე არ იქნება წარმოდგენილი“, - განაცხადა ადვოკატმა ზაზა ბიბილაშვილმა და აღნიშნა, რომ თუ მოსამართლე ურთმელიძე დღესაც არ დააკმაყოფილებს მათ შუამდგომლობას, ისინი მის აცილებას მოითხოვენ.