ირაკლი ფირცხალავამ ე.წ. „კორტების სპეცოპერაციის“ დღევანდელ სასამართლო პროცესზე ბრალდების მიერ წარდგენილ საზღვრის კვეთის შესახებ ცნობასა და დაკითხვის ოქმს შორის ცდომილება აღმოაჩინა.

ბრალდების მხარემ დღევანდელ სასამართლო პროცესზე ექვსი მოწმის ჩვენების გამოქვეყნების შუამდგომლობა დააყენა, რაც მოსამართლემ ნაწილობრივ დააკმაყოფილა. კერძოდ, ფირცხალავას მიერ პროკურატურის მტკიცებულებებში აღმოჩენილი უზუსტობა მოსამართლემ გაიზიარა და ბრალდების მხარეს დამატებითი დოკუმენტაციის წარდგენა მოსთხოვა.

„ბატონო პროკურორო, თქვენს მიერ წარმოდგენილ დოკუმენტში ერთ-ერთი მოწმის, კერძოდ ზვიად სულავას დაკითხის დროდ მითითებულია 2015 წლის 10 თებერვალის 12:25 საათი, მაშინ როდესაც, მას ოფიციალურად ასევე თქვენს მიერ წარმოდგენილ დოკუმენტებში საზღვრის კვეთად მითითებული აქვს 2015 წლის 10 თებერვალი 03:09 საათი, როგორ ავხსნათ ეს ფაქტი? გამოდის, რომ მოწმემ საქართველო დატოვა და ამის შემდეგ დაიკითხა საქართველოს პროკურატურაში?“, - მიმართა ფირცხალავამ პროკურორს.