„ნორიოს“ საწვრთნელი ცენტრის მიმდებარე ტერიტორიაზე გარდაცვლილი რიგითის ვინაობა ცნობილია. „ნიუპოსტის“ ინფორმაციით, დღეს დილით, 06:50 სთ-ზე „ნორიოს“ საწვრთნელი ცენტრის მიმდებარე ტერიტორიაზე ნაპოვნი ახალგაზრდას ცხედარი 23 წლის ტარიელ ფანჩულიძეს ეკუთვნის.

თავადაცვის სამინისტროს ოფიციალური ინფორმაციით, რიგითმა საშტატო იარაღიდან გასროლით, სიცოცხლე თვითმკვლელობით დაასრულა. შემთხვევის ადგილზე აღმოჩენილია წერილი.

„ნიუპოსტი“ მომხადარის შესახებ ტარიელ ფანჩულიძის ოჯახის მეგობარს მარიკა ხვედელიძეს ესაუბრა.

-„მომხდარის შესახებ ჩვენც ახლახან გავიგეთ, შეძრწუებული ვარ მომხდარის გამო, ტარიელის მამა მსახიობია, დედა ჟურნალისტი გახლავთ, უგონო მდგომარეობაში იმყოფება, ვერავინ წარმოიდგენდა რომ, ეს სიცოცხლით სავსე ახალგაზრდა სიცოცხლეს თვითმკვლელობით დაასრულებდა. ძალიან კეთილი, მშრომელი და მოსიყვარულე ბავშვი იყო.“

- შემთხვევის ადგილზე წერილია აღმოჩენილი, თუ გახსნა ოჯახმა წერილი და რა წერია შიგნით?

- ცხედარი პროზექტურაშია გადასვენებული, წერილი ჭირისუფალთან არავის მოუტანია, შესაბამისად არ ვიცით რა წერია შიგნით.

- თვითმკვლელობის სავარაუდო მოტივზე თუ საუბრობენ?

- რაღაც ვალებზეა საუბარი, რა ოდენობის ვალზეა საუბარი გამწარებულ დედას ვერ შევეკითხე... გავიგე რომ ვალი ჰქონია.

„ნიუპოსტი“ გარდაცვლილის დას თამუნა ფანჩულიძეს ესაუბრა:

„არაფერი არ ვიცი, ჯერ სახლში არ მოუსვენებიათ ცხედარი, პროზექტურაშია. არც იმ წერილის შინაარსი ვიცი, რაზეც მეკითხებით. რეალობა შემაძრწუნებელია ჩემთვის. 23 წლის ძმა არ მყავს, უნივერსიტეტი დაამთავრა და ჯარში წავიდა დღეს კი ამ საზარელი ამბის შესახებ გვაცნობეს“,- განაცხადა გარდაცვლილის დამ.

გამოძიება დაწყებულია სსკ-ის 115-ე მუხლით. საქმეს მთავარი პროკურატურა იძიებს.

გარდაცვლილი I მსუბუქი ქვეითი ბრიგადის რიგებში მიმდინარე წლის ნოემბრის თვიდან ირიცხებოდა.

გარცავვლილს მამისუეულ სახლში, თერჯოლაში სავარაუდოდ დღეს გადაასვენებენ, მანამდე კი ცხედარს ექსპერტიზა უტარდება.

დავით ჯაბაშვილი