მაშველი ამბობს, რომ ხანძრის დროს სასტუმროს ოთახი ჩაკეტილი არ ყოფილა

შემთხვევა - 17:38, 10 May, 2015

13459

მაშველი, რომელსაც "ბათუმელები" ესაუბრა, ამბობს, რომ მას ქობულეთში, სასტუმროში გამთენისას მომხდარი ხანძრის ჩაქრობისას ბავშვების ოთახის კარი ჩაკეტილი არ დახვედრია.

სასტუმროს მფლობელი, შერმადინ ართმელიძე ჟურნალისტებთან კომენტარში აცხადებდა, რომ ბავშვები ნომერში ჩაკეტილი ჰყავდათ.

"ბათუმელებმა" ეს ინფორმაცია ერთ-ერთი მაშველთან გადაამოწმა, რომელიც ქობულეთში შემთხვევის ადგილზე იმყოფებოდა და სასტუმროს შენობიდან ბავშვები გამოიყვანა. კარის ჩაკეტვის შესახებ ინფორმაციას ის არ ადასტურებს.

მაშველმა "ბათუმელებთან" საუბრისას განაცხადა, რომ ბავშვები ჯერ კვამლისგან გაიგუდნენ და გვამები შემდეგ დაიწვა:

„პოლიციის თანამშრომელმა დაინახა ხანძარი, პატრული მივარდა სახანძროში... მესამე სართულზე ასვლა უკვე იყო შეუძლებელი, რადგან ხის კიბე, რომელიც სასტუმროში იყო ჩამოვარდა. მასწავლებლებთან ერთად იყვნენ მშობლებიც, ზუსტად არ ვიცი რა მოხდა, მაგრამ ბავშვებთან ერთად იყვნენ როგორც მასწავლებლები ისე მშობლები. ბავშვები არიან კვამლისგან გაგუდულები. როცა მათ ოთახში შევედით სამივე ერთად იწვა,"– განაცხადა მან.

ქობულეთში, სასტუმრო ”არმაზში” გაჩენილმა ხანძარმა სამი არასრულწლოვანის სიცოცხლე იმსხვერპლა.

მოზარდები ბათუმში, კონცერტის გასამართად რუსთავიდან ჩავიდნენ და ქობულეთში სასტუმრო არმაზში იყვნენ დაბინავებულები.

ტრაგედიის გამომწვევი ზუსტი მიზეზი ამ დრომდე უცნობია, თუმცა ერთ-ერთი ვერსიით ოთახში კონდიციონერი იყო ჩართული, რის შედეგადაც ხანძარი გაჩნდა.

პოლიციელებმა და მაშველებმა ერთობლივად, ცეცხლწაკიდებული შენობიდან 45 ადამიანი გამოყვანა შეძლეს, მათ შორის 31 ბავშვი იყო და სასტუმროში მომუშავე ადამიანები. ხანძრმა სამი ბავშის 10, 11 და 12 წლის სკოლის მოსწავლეების სიცოცხლე იმსხვერპლა.

გამოძიება სისხლის სამართლის კოდექსის 187-ე მუხლის მეოთხე ნაწილით მიმდინარეობს, რაც ნივთის დაზიანებას ან განადგურებას ნიშნავს: „რამაც გაუფრთხილებლობით გამოიწვია ორი ან მეტი ადამიანის სიცოცხლის მოსპობა, - თავისუფლების აღკვეთით ვადით ცხრიდან თორმეტ წლამდე.“