,,კლასში წამოუძახებიათ - აყვანილი ხარო...“ – 11 წლის ბავშვის თვითმკვლელობის დეტალები

შემთხვევა - 22:32, 27 Mar, 2015

19893

სიღნაღის რაიონის სოფელ ძველ ანაგაში 11 ბიჭმა თავი ჩამოიხრჩო. როგორც ცნობილია, ის ძმამ და ბებიამ სახლის მიმდებარე სათავსოში გარდაცვლილი იპოვეს. გავრცელებული ინფორმაციით, სუიციდის მიზეზი შესაძლოა კლასელებთან კონფლიქტი ყოფილიყო. ინფორმაიცია „ნიუპოსტს“ შინაგან საქმეთა სამინისტროში დაუდასტურეს. უწყების ცნობით, მომხდარზე გამოძიება 115-ე, მუხლით მიმდინარეობს, რაც თვითმკვლელობამდე მიყვანას გულისხმობს.

როგორც კახეთის საინფორმაციო ცენტრს სკოლის დირექტორის მოადგილე ქეთევან ბეგიაშვილმა განუცხადა, თანაკლასელებმა ბიჭს უთხრეს, რომ ის ნაშვილები იყო. დირექტორის მოადგილე ადასტურებს, რომ ამან ბავშვი გააღიზიანა, რის შემდეგაც მასწავლებელს დაეთხოვა, სახლში წავიდა და ცოტა ხანში თავი ჩამოიხრჩო.

„რამდენიმე დღის წინ, ერთ–ერთ ბავშვს წამოუძახებია მისთვის – აყვანილი ხარო, არადა ნამდვილად ბიოლოგიური მშობლები არიან ესენი. დღეს, დილითაც ასეთი ინციდენტი მოხდა, მაგრამ დირექტორი ჩაერია და სიტუაცია განმუხტა. თანაკლასელებმა წამოაძახეს, აყვანილი ხარო. როცა ბავშვებს ვკითხეთ, ამას ბავშვს რატომ ეუბნებოდნენ, გვითხრეს, სახლში მშობლები ასე საუბრობენო. მომხდარის შემდეგ, თვითონ ბავშვმა სთხოვა მასწავლებელს, შეიძლება სახლში წავიდეო? მასწავლებელმა ჰკითხა, დედა სახლში იყო თუ არა. არა, დედა სამუშაოდ არის წასული, ბებია სახლშიაო. ბავშვი პირველი გაკვეთილიდან გაუშვა კლასის ხელმძღვანელმა დირექტორის ნებართვით. ერთ–ერთი თანაკლასელი გააყოლა თან. როგორც დედა ამბობს, ბავშვმა დამირეკა და მითხრა, ცოტა ადრე მოვედი სკოლიდან, ყველაფერი კარგად არის, ვიმეცადინებ და ჩემ კლასელებთან ერთად ინგლისურზე წავალო. დედას უთქვამს, კარგიო. მერე რომ გადმოურეკავს, ალბათ, შეამოწმა ბავშვი, ბიჭი აღარ პასუხობდა. მეტი არაფერი ვიცი. ბებია ამბობს, სახლის გვერდზე ვნახეთ გარდაცვლილიო, თავი მოიკლა“, – აღნიშნავს სკოლის დირექტორის მოადგილე.