რამდენიმე დღეა გაუჩინარებულ ამირან ქარსიძეს უშედეგოდ ეძებენ. იგი კორპორატიული საღამოდან დეიდის სახლში მიიყვანეს, რის შემდეგაც მისი კვალი დაიკარგა. პოლიციას 28 დეკემბრის ღამის ყველა ჩანაწერი აქვს ამოღებული, თუმცა ქარსიძე არსად არ ფიგურირებს, მის გაუჩინარებასთან დაკავშირებით რამდენიმე ვერსია არსებობს.

ამირან ქარსიძე კორპორატიული საღამოდან ზაჰესის დასახლებაში დეიდის სახლთან მეგობარმა მიიყვანა.

ქარსიძის დაკარგვასთან დაკავშირებით მისი მეგობრები და ნათესავები საუბრობენ, მათი თქმით არ არის გამორიცხული, რომ იგი ოკუპირებულ ტერიტორიაზე იყოს დაკავებული, რადგან ქარსიძე შესაძლოა შვილების სანახავად წასულიყო სოფელში და საზღვართან მისი დაკავება მომხდარიყო.

ამირან ქარსიძის მეგობრები კონფლიქტის არსებობასაც არ გამორიცხავენ, ქარსიძის მეგობრის თქმით, შესაძლოა მას ვინმესთან შელაპარაკებაც მოსვლოდა, რის შემდეგაც კონფლიქტი სხვა ადგილას გაგრძელებულიყო.