ენგურის ხიდიდან გატაცებული შსს-ს თანამშრომლის საქმის დეტალები

შემთხვევა - 22:11, 29 Dec, 2014

2792

საოკუპაციო ხაზიდან გატაცებული განსაკუთრებულ დავალებთა მეორე სამმართველოს უზრუნველყოფის სამსახურის უფროსის პაატა თოდუა გასათავისუფლებლად მოლაპარაკებები მიმდინარეობს, ,,ნიუპოსტის“ ინფორმაციით მას უშუალოდ სამეგრელო-ზემო სვანეთის გუბერნატორი აწარმოებს.

38 წლის პაატა თოდუა სოფელ რუხში, ენგურის ხიდის მიმდებარე ტერიტორიიდან გაიტაცეს. ,,ნიუპოსტის“ ინფორმაციით აფხაზური მილიციის შეიარაღებული პირები ენგურის ხიდზე თითქმის შუამდე იყვნენ გადმოსული, მათ თან ახლდათ რუსი კონტრდაზვერვის თანამშრომელი ალექსანდრე კოლაგინი. სწორედ ამ დროს მოხდა პაატა თოდუას გატაცებაც. გავრცელებული ინფორმაციით არსებობს ორი ვერსია. პირველის თანახმად, პაატა თოდუა მათთან სასაუბროდ იქნა მიწვეული, ხოლო მეორე ვერსიით, თოდუა ოჩამჩირეში მცხოვრებ მამას სოფელ რუხის მხარეს ელოდებოდა, ქართული მხარის კონტროლირებად ტერიტორიაზე, მისი იქ ყოფნის შესახებ სეპარატისტებმა შეტყობინება მიიღეს, რაც აფხაზური მილიციის მიერ იქნა დადასტურებული.

თოდუას ოჯახს შვილის გათავისუფლებაში დახმარებას დაპირდნენ განსაკუთრებულ დავალებთა მეორე სამმართველოს უფროსი ბადურ შენგელია და მხარის გუბერნატორი. ოჯახი ამ თემაზე საუბარს თავს არიდებს. როგორც ,,თავისუფლებისა და მხარდაჭერის ცენტრის“ ზუგდიდის ოფისის წარმომადგენლები აცხადებენ, ბადურ შენგელია მხარის გუბერნატორის დეიდაშვილია და სწორედ მათ ამ საქმის გახმაურება და ზედმეტი აჟიოტაჟი არ სურთ.