გურიაში, სოფელ დვაბზუში მამაკაცი გულის შეტევით გარდაიცვალა. თვითმხილველების განცხადებით, შეუძლოდ მყოფ ზურაბ მგელაძისთვის სასწრაფო სამედიცინო დახმარების ბრიგადის გამოძახება გახდა საჭირო. თუმცა, მათივე თქმით, სასწრაფომ დაიგვიანა, მამაკაცი კი სწორედ ამ მიზეზის გამო გარდაიცვალა.

სოფლის მოსახლეობა მომხდარში ხელისუფლებას ადანაშაულებს. მათი განმარტებით, ჯანდაცვის სისტემაში გატარებული რეფორმის შედეგად, ოზურგეთს და მის 28 სოფელს მხოლოდ 2 სასწრაფო სამედიცინო მანქანა ემსახურება.

„ნიუპოსტის“ კორესპონდენტის ცნობით, სასწრაფო დახმარების ხელმძღვანელი, ნანა გოლიაძე აცხადებს, რომ დვაბზუში მამაკაცის გარდაცვალების ფაქტი რეგისტრაციაში გატარებული არ არის: „დაუაკშირდით პრესსამსახრს, მე ვერაფერზე გიპასუხებთ, არსად არავის არ დაუგვიანია და არც გარდაცვალება ფიქსირდება“, - აცხადებს გოლიაძე.

„ნიუპოსტის“ კორესპონდენტი სასწრაფო სამედიცინო დახმარების საზოგადოებასთან ურთიერთობის სამსახურის ხელმძღვანელსაც დაუკავშირდა, რომელმაც მომხდარზე დეტალური ინფორმაცია მოგვაწოდა:

„112-ზე გამოძახება დაფიქსირდა 17 საათსა და 02 წუთზე, ერთდროულად იყო ორი გამოძახება, სხვადასხვა სოფლებში. ერთი იყო ჩვილი ბავშვი სოფელ ბოხვაურში და მეორე 56 წლის მამაკაცი სოფელ დვაბზუში, ორივე უგონო მდგომარეობაში იმყოფებოდა. გამოძახებაზე გასული ბრიგადებიდან, პირველი რომელიც გათავისუფლდა, წავიდა ჯერ ბოხვაურში, რათა დახმარება გაეწიათ პატარასთვის. იქ მისულებს ბავშვი საავადმყოფოში უკვე გადაყვანილი დახვდათ, ამიტომ 17 საათსა და 16 წუთზე წამოვიდნენ დვაბზუში, სადაც ბრიგადა 17 საათსა და 35 წუთზე მივიდა, მაგრამ მამაკაცი უკვე გარდაცვლილი დახვდათ".

თეა იოსელიანი - გურია