აზერბაიჯანში ავტოავარიის შედეგად დაღუპული 3 მგზავრიდან ერთი, 10 წლის ბავშვი საქართველოს მოქალაქეა. ავტობუსი, რომელიც ავტოსაგზაო სემთხვევაში მოჰყვა და დაიწვა, კერძო პირს - ვასიპ ოსმანოვს ეკუთვნოდა.

მძღოლს ხელშეკრულება სადახლოზე კომპანია „ინასთან“ ჰქონდა გაფორმებული და რეგულარულ რეისებით სადახლო-ბაქოს მიმართულებით დადიოდა.

საქართველოს ტერიტორია ოსმანოვმა მგზავრებთან ერთად 3 დღის წინ დატოვა და ის დღეს უნდა დაბრუნებულიყო.

„ინაში“ ავარიის ერთ-ერთ მიზეზად იმას ასახელებენ, რომ შესაძლოა, მძღოლს საჭესთან ჩაეძინა. დამატებით ინფორმაციას აზერბაიჯანში მომხდარ ტრაგედიაზე კომპანიაში არ ფლობენ.

ავტოსაგზაო შემთხვევა აზერბაიჯანში, ბაქოდან 370 კილომეტრის დაშორებით, გეგკელის რაიონში გვიან ღამით მოხდა. ავარიის შედეგად გარდაცვლილი 2 ადამიანი აზერბაიჯანის მოქალაქეა. დილიდან რუსულ წყაროებში ვრცელდებოდა ინფორმაცია, რომ სამივე გარდაცვლილი საქართველოს მოქალაქე იყო.

ავტოსაგზაო შემთხვევის შედეგად, 20-მდე ადამიანი დაშავდა. ავტობუსში, რომელიც სატვირთო ავტომობილს დაეჯახა, სულ 40-მდე მგზავრი იმყოფებოდა. დაშავებულები საავადმყოფოში დილის 4 საათისთვის გადაიყვანეს. მათგან 2-ის მდგომარეობა კრიტიკულია. მათ შორის არის ავტობუსის მძღოლიც. საავადმყოფოში იმყოფებიან საქართველოს მოქალაქეებიც, რომელთა მდგომარეობა სტაბილურია.

დაშავებული მგზავრები აცხადებენ, რომ სატვირთო მანქანა და ავტობუსი ერთი მიმართულებით მოძრაობდნენ და მძღოლმა საჭე ვერ დაიმორჩილა.

ამ დროისთვის შემთხვევის ადგილზე იმყოფება აზერბაიჯანში საქართველოს საკონსულოს წარმომადგენელი, რომელიც დაშავებული ქართველების საბუთების მოწესრიგებაზე მუშაობს, რათა დროულად მოხერხდეს მათი გადმოყვანა.