წუხელ მთელი ღამის განმავლობაში, გორის ძველ ბაზარში ხმაური იყო, მოვაჭრეები და ბაზრის ადმინისტრაციის წარმომადგენლები ერთმანეთს დაუპირისპირდნენ. მათ ერთმანეთს სიტყვიერი შეურაცხყოფა მიაყენეს, ადგილი ჰქონდა ფიზიკური დაპირისპირების მცდელობასაც.

ინციდენტი მას შემდეგ დაიწყო, რაც ბაზრის ადმინისტრაციის წარმომადგენლები ძველი ბაზრის ტერიტორიაზე სატვირთო ავტომობილებით მივიდნენ და სამშენებლო ნარჩენების დაყრა სცადეს.

თუმცა, ასობით მოვაჭრემ მათ ამის საშუალება არ მისცა.

„ათამდე მანქანით მოიტანეს ნაგავი, აქ უნდა დაეყარათ, გვეუბნებოდნენ დაცალეთ ტერიტორიაო, მაგრამ ჩვენ ამის საშუალება არ მივეცით, ერთ მუშტად შევიკარით ყველანი და ტერიტორია არ დავაბინძურებინეთ. ლუკმა პურის წართმევის საშუალებას არავის მივცემთ“, - აცხადებს „ნიუპოსტთან“ საუბრისას მაია ინაური.

ინციდენტის დროს ადგილზე საპატრულო პოლიციის თანამშრომლებიც მივიდნენ, რომლებმაც სიტუაციის განმუხტვა შეძლეს. მოვაჭრეები ტერიტორიაზე 24 საათის განმავლობაში პატრულირებენ და აცხადებენ, რომ ბაზარს არ დატოვებენ.

გიორგი ახალკაცი გორი სპეციალურად „ნიუპოსტისთვის“