რატომ ცდილობდა შავებში ჩაცმული დედა ტორესის ნახვას?

სპორტი - 13:22, 01 Jul, 2014

2617

ტორესს სტადიონზე მისვლისას ერთი ახალგაზრდა ქალი ელოდა, უცნაურად, შავებში გამოწყობილი, ხმას არ სცემდა არავის, იდგა განცალკევებით. ტორესის ავტობუსიდან ჩამოსვლისას, სცადა მასთან მიახლოვება, თუმცა ვერ მოახერხა. ხელში რაღაც ეჭირა და მისთვის მიცემას ცდილობდა, მაგრამ, სამწუხაროდ, უშედეგოდ.
თამაშის შემდეგ, შავებში გამოწყობილი ქალი გარეთ იდგა, “ჩელსის“ ავტობუსი კი სტადიონს ტოვებდა. ქალს ხელში ფურცელი ეჭირა, რომელზეც თავისი შვილის ფოტო იყო ფერნანდო ტორესთან ერთად. ტორესმა შენიშნა ეს ქალი, უცნაურად მოეჩვენა შავებში ჩაცმული ქალის ნახვა, რომელიც არა შვილთან ერთად, არამედ მარტო იდგა ფოტოსთან ერთად და ავტობუსში ასვლამდე გადაწყვიტა მასთან მისვლა, გასაუბრება. ქალმა არ ისურვა საუბარი, წერილი გადასცა და ტორესიც გუნდს შეუერთდა.
ესპანური პრესა დაინტერესდა ამ ფაქტით – ვინ იყო ის ქალი, რა გადასცა მან ტორესს და გადაწყვიტა, გაერკვია ყოველივე ეს. მათ მოახერხეს ამ ქალის პოვნა და მასთან გასაუბრება.
ისტორია საკმაოდ მძიმე აღმოჩნდა. 1998 წელს ადრიანა ერნანდესს, ქალაქ მადრიდში შვილი ეყოლა, ბიჭი – სახელად დავიდი. ცხოვრებამ არ გაუღიმა და სამწუხაროდ დაუნის სინდრომით დაიბადა, მაგრამ მიუხედავად ამისა, მხიარული ბავშვი იყო და უხაროდა ცხოვრება. მამას სტადიონზე დაჰყავდა ხშირად. მისი საყვარელი ფეხბურთელი ფერნანდო ტორესი იყო, რომლის გამოც მამას სთხოვდა ხოლმე “ატლეტიკოს“ თამაშებზე წაყვანას. ბედნიერი იყო, როდესაც პირველი ის მაისური მოირგო “ატლეტიკოსი“, რომლის ზურგზე ტორესი ეწერა.
“ლივერპულში“ გადასვლისას ტორესი საკუთარ გულშემატკივარს ემშვიდობებოდა, ავტოგრაფებს ურიგებდა. როდესაც მასთან პატარა ბიჭი მივიდა, მას ავტოგრაფი არ უთხოვია ტორესისთვის, ფოტო გადაიღო და მხოლოდ 2 სიტყვა უთხრა: – “მჯერა, დაბრუნდები“.
მას მერე დავიდის ცხოვრება სხვანაირად წარიმართა. მას აღარ უხაროდა “ატლეტიკოს“ თამაშებზე სიარული, მისი გმირი აწი “ლივერპულში“ იყო. დავიდი სახლიდანაც იშვიათად გადიოდა – ტორესის ვიდეოებს უყურებდა, ოთახი მისი პლაკატებით იყო სავსე. ტორესის ერთ-ერთ პლაკატზე წარწერა ჰქონდა გაკეთებული: “ის დაბრუნდება!“.
გავიდა წლები და ტორესი მადრიდში დაბრუნდა, უკვე “ჩელსის“ მაისურით. ბავშვი სიხარულისგან მეცხრე ცაზე იყო, სტადიონზე წასვლისას მას კვლავ თავისი გმირი დახვდებოდა, რომ არა…
მან წინა დღით გადაწყვიტა გუნდის ვარჯიშზე ფერნანდოს ნახვა, მამასთან ერთად სტადიონისკენ მიეშურებოდა, როდესაც კატასტროფა დატრიალდა – ავტოავარიის შედეგად, 16 წლის დავიდის გულმა ძგერა შეწყვიტა.
შოკში ჩავარდნილმა დედამ შეძლო ძალები მოეკრიბა – გადაწყვიტა სტადიონზე მისვლა და ტორესთან შეხვედრა. წერილში, რომელიც მან ფერნანდოს გადასცა, სწორედ ზემოთ მოყოლილი ისტორია იყო. როგორც დედა აცხადებს, მას ამ წერილიდან დაახლოებით 1 კვირაში (განმეორებით მატჩამდე 1 დღით ადრე) ტორესი დაუკავშირდა და შემდეგი სიტყვები უთხრა: “მას სჯეროდა ჩემი დაბრუნების და ის აუცილებლად იხილავს ჩემს დაბრუნებას. ის არსად წასულა, ჩვენს გულებშია. დავბრუნდები და “ატლეტიკოს“ გოლს და გამარჯვებას მასთან ერთად აღვნიშნავ.“
როგორც მოგვიანებით გახდა ცნობილი, “ატლეტიკო-რეალის“ ფინალის დროს ტორესი მადრიდში იმყოფებოდა და დავიდის სასაფლაოსთან გაატარა 120წუთი (მატჩი ამდენ ხანს გაგრძელდა), დავიდთან ერთად ქომაგობდა “ატლეტიკოს“.
დედის განხცადებით, ის დღეს ბედნიერია, რადგან იცის, რომ თავისმა შვილმა ოცნება აიხდინა. მან იცის, რომ შვილის გმირი, სახელად ფერნანდო ტორესი, აუცილებლად დაბრუნდება მადრიდში და კვლავ გაახარებს პატარა გულშემატკივარს, რომელსაც ყოველთვის სჯეროდა, რომ ის დაბრუნდება!წყარო: http://goal.ge/