იგორ კოკოშკოვი კალათბურთელთა ეროვნულ ნაკრებში რჩება

სპორტი - 10:03, 11 Mar, 2014

2156

კალათბურთის ეროვნული ფედერაციის ინფორმაციით, იგორ კოკოშკოვი საქართველოს კალათბურთელთა ეროვნულ ნაკრებში კიდევ ორი წელი იმუშავებს.
როგორც ცნობილია, თანამშრომლობის გაგრძელებაზე შეთანხმება უკვე შედგა და ახალი ხელშეკრულების თანახმად, კოკოშკოვი საქართველოს ეროვნულ ნაკრებს 2014 და 2015 წლების მატჩებში უხელმძღვანელებს.
ამასთან, საქართველოს ნაკრებს მიმდინარე წლის აგვისტოში ევროპის ჩემპიონატის შეარჩევ ტურნირში მოუწევს ასპარეზობა ჩეხეთის, უნგრეთისა და პორტუგალიის ნაკრებებთან. წარმატების შემთხვევაში საქართველო ზედიზედ მესამედ გავა ევროპის ჩემპიონატის ფინალურ ეტაპზე, რომელსაც 2015 წელს უკრაინა უმასპინძლებს.
კოკოშკოვი საქართველოს ნაკრებთან 2008 წლიდან მუშაობს, როცა ნაკრები ევროპის B დივიზიონში ასპარეზობდა. სერბი სპეციალისტის ხელმძღვანელობით ნაკრები პირველივე ციკლში A დივიზიონში გადავიდა, საიდანაც პირველივე ცდაზე ევროპის ჩემპიონატის ფინალურ ეტაპზე გავიდა.
2011 წელს ლიტვაში გამართულ ევრობასკეტზე საქართვეოს ნაკრები კონტინენტის საუკეთესო 11 გუნდში მოხვდა.წინა წელს, სლოვენიაში გამართულ ევროპის ჩემპიონატზე თამაშის შემდეგც იგორ კოკოშკოვს საქართველოს კალათბურთის ფედერაციასთან ხელშეკრულება ამოეწურა.
კოკოშკოვის გარდა, საქართველოს კალათბურთის ფედერაციას ეროვნული გუნდის მწვრთნელობის კიდევ ერთი სერბი კანდიდატი ჰყავდა, თუმცა ისევ კოკოშკოვზე შეჩერდა. მოლაპარაკებები 10 მარტს დასრულდა.

ნინა შადური