თორნიკე შარაშენიძე: უმრავლესობა უნდა ჩავიდეს კიევში... იქ წყდება რეალურად ჩვენი ბედი

პოზიცია - 14:00, 03 Mar, 2014

3370

ექსპერტი თორნიკე შარაშენიძე საქართველოს საგარეო საქმეთა სამინისტროს უკრაინასთან მიმართებაში გაკეთებულ განცხადებას ადეკვატურს უწოდებს, თუმცა მიიჩნევს, რომ ამ ეტაპზე კარგი იქნება საპარლამენტო უმრავლესობა კიევში თუ ჩავა.
„არ შეიძლება „ოცნებამ“ დაუთმოს ოპოზიციას ეს ინიციატივა, უმრავლესობა უნდა მიხვდეს, რომ უნდა ჩაებას ამ პროცესში, იქ წყდება რეალურად ჩვენი ბედი“,- განაცხადა „ნიუპოსტთან“ საუბრისას თორნიკე შარაშენიძემ.
ექსპერტმა იმ ამოქმედებულ და ასამოქმედებელ ბერკეტებზეც ისაუბრა, რომელიც დასავლეთს რუსეთთან მიმართებაში გააჩნია.
„ამოქმედდა უკვე ერთი ბერკეტი, საფონდო ბირჟა - რუბლის კურსი მკვეთრად დაეცა, თუ ამას უფრო ხელს შეუწყობს დასავლეთი კიდევ იმით, რომ განახორციელებს მიზანმიმართულად შეტევას რუსულ რუბლზე, ეს კიდევ უფრო კატასტროფული შედეგებით გაგრძელდება... ეს ჯერ კიდევ დასაწყისია, ჯერ რეალურად არ განხორციელებულა რუსეთის მთავრობის წარმომადგენლების ანგარიშების დაყადაღება და გაყინვა, ისინი სწორედ დასავლეთში ინახავენ ფულს, დასავლეთში ფლობენ ძალიან დიდ უძრავ ქონებას და ეს იქნება მათთვის ყველაზე მძიმე დარტყმა“,- აცხადებს ექსპერტი.
მისივე თქმით, ჯერ სამხედრო ბერკეტი არაა მოსალოდნელი, - „იმიტომ, რომ დასავლეთს რუსეთთნ ბევრი უპირატესობა გააჩნია, მაგრამ არა მხოლოდ სამხედრო...სამხედროთი ბუნებრივია არ დაიწყებს, დაიწყებს, სწორედ - ფინანსური ბერკეტით“.
შარაშენიძე მიიჩნევს, რომ ეს იქნება უფრო დიდი დარტყმა რუსეთისთვის.
„ისინი წლობით აგროვებენ ფულს და ქონებას, იქ სიარული ძალიან უყვართ, მათ დასავლეთი სჭირდებათ უფრო მეტად, ვიდრე დასავლეთს სჭირდება რუსეთი“,- ამბობს შარაშენიძე.
ექსპერტი მიიჩნევს, რომ რუსების ინტერესებში შედის ის, რომ საქმე აქამდე არ მივიდეს, რადგან მისივე განცხადებით, ყველა ვარიანტში სცენარი კატასტროფულად დამთავრდება და პირველ რიგში რუსეთისთვის.
„როგორც ჯონ კერიმ განაცხადა, შესაძლოა, სამხედრო გზებითაც მოხდეს ადეკვატური პასუხის გაცემა. არ გამოვრიცხავ, რომ ამერიკული ინსტრუქტორები დაეხმარონ უკრაინის არმიას, მაგრამ მე მაინც მგონია, რომ საქმე აქამდე არ მივა“, - აღნიშნა „ნიუპოსტთან“ საუბისას თორნიკე შარაშენიძემ.
ნინა შადური