ენმ-ს წევრის სალომე სამადაშვილის განცხადებით, შარლ მიშელის დოკუმენტი, რომელიც ევროკავშირის წარმომადგენლობამ მხარეებს წარუდგინეს, წინა შეთავაზებასთან შედარებით გაუმჯობესებულია. მისივე განმარტებით, დოკუმენტზე ხელმოწერამდე ნაციონალურ მოძრაობას სჭირდება დრო, რადგან გარკვეულ საკითხებთან მიმართებაში არის პრობლემები და საჭიროა საბოლოო პოზიცია შეჯერდეს:

"დღევანდელი დოკუმენტი გარკვეულწილად არის გაუმჯობესება იმასთან შედარებით, რაზეც იყო საუბარი უკანასკნელი მოლაპარაკებების რაუნდზე, პოლიტპატიმრებთან მიმართებით ვფიქრობ, რომ ბევრად უფრო მკაფიო არის გზა მათი გათავისუფლების და ვადამდელი არჩევნების თემაც აისახა დოკუმენტში. რაც შეეხება ჩვენს საბოლოო პოზიციას, ჩვენ გეტყვით პირდაპირ, რომ გარკვეულ საკითხებთან მიმართებაში გვაქვს პრობლემები, შემოთავაზებულ დოკუმენტში რაც არის ასახული, ამიტომ უნდა გავაგრძელოთ მსჯელობა და შიდაკონსულტაციები იმისთვის, რომ ჩამოყალიბდეს ნაციონალური მოძრაობის საბოლოო პოზიცია.

მე შემიძლია გითხრათ, რომ წინ ნაბიჯი გადაიდგა, გამოიკვეთა გზა, როგორ შეიძლება გავათავისუფლოთ პოლიტპატიმრები და როგორ მოხდეს პოლიტიკური შეთანხმება სამომავლო პოლიტიკურ კურსთან დაკავშირებით, კონკრეტულად ვადამდელ არჩევნებთან დაკავშირებით", - აღნიშნა სამადაშვილმა.