ხელისუფლებასა და ოპოზიციას შორის მოლაპარაკებების დაწყებამდე "გირჩი - მეტი თავისუფლების" ლიდერმა გაკეთა კომენტარი და აღნიშნა, რომ თუ ევროკავშირის წარმომადგენლობის მიერ მოცემულ დოკუმენტში პოლიტპატიმრებისა და ვადამდელი არჩევნებისკენ მიმსასვლელ გზაზე პუნქტები არ იქნება გაწერილი, დოკუმენტს ხელს არ მოაწერს. ჯაფარიძე იმედოვნებს, რომ დღევანდელ შეხვედრაზე ახალი ტექსტი იქნება წარმოდგენილი:

„რა ტექსტი იქნება ინფორმაცია არ მაქვს, წარმოდგენა არ მაქვს, არ მგონია, რომ ხუთივე პუნქტში იყოს რამე ცვლილებები. ზოგადად იმედი მაქვს, რომ ახალი ტექსტი იქნება და იგივე ტექსტი არ იქნება, რაც ბოლო რაუნდზე იყო. რაღაც ალბათობაც არსებობს, რომ იგივე ტექსტი მოიტანონ.

ორი საკითხი იყო - პოლიტპატიმრების, პოლიტიკური დევნის შეწყვეტის, ასევე ხელახალ არჩევნებზე მისასვლელი გზა. თუ რამე ცვლილებები იქნება ამ ორ პუნქტში უნდა იყოს ცვლილება, რომ ოპოზიცია დათანხმდეს. პირობა, რაც მედიატორებს ვუთხარი ნიკა მელიას გათავისუფლების, პირველ რიგში მისაღები უნდა იყოს თავად მელიასთვის. ეს პუნქტები წინაზე, როგორც იყო გაშლილი დოკუმენტში არ იყო მისაღები. თუ ეს ორი პუნქტი არ იქნება გაწერილი, მაშინ არ მოვაწერ ხელს“, - განაცხადა ზურაბ ჯაფარიძემ.

ევროკავშირის წარმომადგენლობის ოფისში ხელისუფლებასა და ოპოზიციას შორის მოლაპარაკებები განახლდა. დიალოგის პროცესში ევროკავშირის ელჩი კარლ ჰარცელი და აშშ-ის ელჩი კელი დეგნანი არიან ჩართულები.