"ევროპული საქართველოს" ლიდერი გიგა ბოკერია ხელისუფლებასა და ოპოზიციას შორის დაგეგმილ დღევანდელ შეხვედრას ეხმაურება და აცხადებს, რომ ოცნების კომპრომისი უნდა მოიცავდეს პოლიტპატიმრების გათავისუფლებასა და რიგგარეშე არჩევნებისკენ სვლას. მისივე თქმით, ოპოზიცია ყველა შანსის გამოყენებას აპირებს, სადაც გონივრული კომპრომისის შესაძლებლობა იქნება:

„კომპრომისიც ჩვენივე შეთავაზებული გვაქვს პლებისციტის სახით და ბუნებრივია, ვადებზე უნდა ვისაუბროთ. კრიზისიდან რეალურ გამოსავალს სჭირდება ნორმალური არჩევნები, პოლიტიკური დევნის გაჩერება და ივანიშვილის რეჟიმის მშვიდობიან არჩევნებში დამარცხება, მაგრამ ეს პროცესი უნდა დაიწყოს და ამისთვის ჩვენ ყველა შანსის გამოყენებას ვაპირებთ, სადაც შესაძლებლობა იქნება გონივრული კომპრომისის. ჩვენი ჩარჩოები ცნობილია, ჩვენი კომპრომისი შეთავაზებულია პლებისციტის სახით. ეს ძალიან სერიოზული დათმობაა. იმაზე დაყრდნობით, რაც მე გითხარით, თუ იქნება ამ მიმართულებით ნაბიჯები გადადგმული მმართველი პარტიისგან, რა თქმა უნდა, ჩვენ მოწადინებული ვართ. ბუნებრივია შეთანხმება უნდა იყოს ისეთი, რომელიც რეალურად დაიწყებს ქვეყნის გამოყვანას კრიზისიდან. მუდმივი კომუნიკაცია არსებობს პოლიტიკურ სპექტრს და დიპლომატიურ კორპუსს შორის. რა შეხვედრაც უნდა ყოფილიყო ამის შესახებ დღეს გავიგეთ და დრამატულად მოულოდნელი ამაში, არაფერი არ არის“,- განაცხადა გიგა ბოკერიამ.

ევროკავშირის წარმომადგენლობის ოფისში ხელისუფლებისა და ოპოზიციის წარმომადგენლებს შორის შეხვედრა 19:00 საათზე გაიმართება.