"ქართული ოცნების" თავმჯდომარემ ირაკლი კობახიძემ აშშ-ის სენატორებთან ჯინ შაჰინთან და რომ ჯონსონთან შეხვედრის შემდეგ განცხადება გააკეთა და აღნიშნა, რომ მათი რჩევები და მოსაზრებები მმართველი პარტიის მხრიდან გათვალისწინებული იქნება. კობახიძის თქმით, შეხვედრის დროს ყურადღება გამახვილებული იყო დიალოგის პროცესზე:

„ძალიან საინტერესო და მეგობრული შეხვედრა გვქონდა სენატორებთან ჯინ შაჰინთან და რონ ჯონსონთან. როგორც მოგეხსენებათ ისინი განსაკუთრებულად არიან დაინტერესებული იმ პროცესებით, რომელიც ვითარდება ჩვენს რეგიონში, კონკრეტულად საქართველოში. ჩვენ კიდევ ერთხელ მივაწოდეთ დეტალური ინფორმაცია სენატორებს იმასთან დაკავშირებით, როგორ წარიმართება პროცესები რეგიონსა და საქართველოში. რა თქმა უნდა, განსაკუთრებული ყურადღება გავამახვილეთ დიალოგის პროცესზე, იმ პროცესებზე, რომელიც დაკავშირებულია პარლამენტის ფუნქციონირებასთან. ჩვენთვის ძალიან მნიშვნელოვანი იყო ჩვენი მეგობრების მოსაზრებების, რჩევის მოსმენა. ბუნებრივია, ეს რჩევები და მოსაზრებები გათვალისწინებული იქნება ჩვენი მხრიდან შემდგომი ნაბიჯების გადადგმის დროს“, - განაცხადა ირაკლი კობახიძემ.