ოცნების ოფისთან დაკავებულ გიორგი მუმლაძეს, რომელიც პოლიციელის მიმართ ძალადობაშია ბრალდებული, ბრალს დღეს ოფიციალურად წარუდგენენ. დღესვე დაკავებული აქტივისტების პროცესი გაიმართება საქალაქო სასამართლოში.

სასამართლოს ეზოში კი მოძრაობა "შეცვალე" აქციას მართავს და გიორგი მუმლაძეს მხარდაჭერას უცხადებს. აქციის მონაწილეებმა ადგილზე პოლიციელების გამოსახულებით ბანერები მიიტანეს:

"ჩვენი მთავარი სათქმელია, იმ პოლიციელების ჩვენება, რომლებიც დადიან აქტივისტების აქციაზე და აკავებენ აქტივისტებს. ბანერებზე ჩამოთვლილია, თუ რით გამოირჩევიან ისინი, მაგალითად გოგა მემანიშვილი, გამოირჩევა იმით, რომ მისი ნათლიაა ადიკო ივანიშვილი. ასევე, დაკავებაში მას უწერია 100%, იმიტომ, რომ ყველა დაკავებაში იღებს მონაწილეობას, ასევე ხელების გადაგრეხვა მისი სავიზიტო ბარათი გახდა. ის უშუალოდ აკავებს ხოლმე, ყველა იმ აქტივისტს, რომელიც პროტესტს გამოხატავს. ასევე 20 ივნისს, მას შემდეგ, რაც ადამიანებს თვალები დათხარეს, შინაგან საქმეთა სამინისტრომ გოგა მემანიშვილს აჩუქა ბინა", - განაცხადა აქტივისტმა დიმიტრი ბიძინაშვილმა.

შეგახსენებთ, გუშინ ქართული ოცნების ოფისთან მოძრაობა "საქართველოსთვის" აქციას მართავდა. ისინი ოკუპირებული ტერიტორიებიდან გადმოსული საქართველოს მოქალაქეებისთვის ხუთდღიანი კარანტინის მოხსნას მოითხოვდნენ და სახელისუფლებო გუნდის წევრებთან შეხვედრა სურდათ, რაზეც უარი მიიღეს. ამის გამო, გადაწყვიტეს გზის სავალ ნაწილზე წარწერები გაეკეთებინათ, რასაც პოლიციასა და აქტივისტებს შორის დაპირისპირება მოყჰვა. მუმლაძესთან ერთად ოთხი აქტივისტი დააკავეს. გიორგი მუმლაძეს სისხლის სამართლის დანაშაულს, ხოლო დანარჩენებს ადმინისტრაციულ სამართალდარღვევას ედავებიან.