ოცნებიდან გახარიას გუნდში წასული დეპუტატი ბექა ლილუაშვილი აშშ-ის სახელმწიფო დეპარტამენტის განცხადებას სოციალურ ქსელში ეხმაურება და წერს, რომ შექმნილ პოლიტიკურ კრიზისში მმართველ პარტიას ეკისრება მეტი პასუხისმგებლობა და კომპრომისის ჩვენება დეესკალაციის მიზნით, თუმცა ოცნება რადიკალიზციის პროცესში თავიდან ფეხებამდეა ჩაფლული და დეესკალაციის მცდელობაც არ აქვს:

"იმ ფონზე, როდესაც ქართული ოცნების თავმჯდომარე ვაშინგტონში ოფიციალური ვიზიტით იმყოფება, ამერიკის სახელმწიფო დეპარტამენტი ავრცელებს განცხადებას, რომელშიც იმედგაცრუებას გამოთქვამს მმართველი პარტიის პასუხისმგებლობის ხარისხზე, რაც გამოიხატა პოლიტიკური რადიკალიზაციის პროცესში სახელმწიფოსა და ქართველი ხალხის ინტერესებზე მაღლა ვიწრო პოლიტიკური ინტერესების დაყენებით. (აღარაფერს ვამბობ ოპოზიციის მიმართ იმავე შეფასებაზე დეპარტამენტის მხრიდან, მათ ისედაც არასოდეს ყოფნიდათ პასუხისმგებლობა).

ამავდროულად, სახელმწიფო დეპარტამენტის განცხადებაში მკაფიოდაა აღნიშნული, რომ სახელისუფლებო ძალებს ეკისრებათ მეტი პასუხისმგებლობა და შესაბამისად მეტი კომპრომისის ჩვენება პროცესის დეესკალაციის მიზნით.

შეგახსენებთ, რომ ეს არის უკვე მეორე სტრატეგიული პარტნიორი, რომელიც გვეუბნება, რომ " მმართველ პარტიას და ოპოზიციას ჯერ არ გამოუხატავს სურვილი და ნება საკუთარ პოლიტიკურ ინტერესებზე მეტად, ქართველი ხალხის ინტერესების პრიორიტეტიზება მოახდინოს."

მსგავსი შეფასებების ფონზე, პოლიტიკური რადიკალიზაციის პროცესში თავიდან ფეხებამდე ჩაფლული მმართველი პარტიის მიერ ამ პროცესის ქართველი ხალხის ინტერესების შესაბამისად ფსევდო დეესკალაციის ლეგენდასაც ძირი გამოეცალა.

ამიტომ, ნურავის გაუკვირდება, როდესაც ვამბობ, რომ სამწუხაროდ, ქართული ოცნების, როგორც ხალხის მიერ არჩეული პოლიტიკური ძალის დღის წესრიგი, აღარ არის თანხმევდრაში ამავე ხალხის ინტერესებთან!" - წერს ლილუაშვილი სოციალურ ქსელში.