ოპოზიციური სპექტრი გახარიას ახალი გუნდის შექმნას სკეპტიკურად უყურებს და თვლის, რომ ივანიშვილის თამაშის ნაწილია და ხელისუფლებას სრულფასოვან ოპონირებას ვერ გაუწევს:

"არც ერთ საკითხთან დაკავშირებით ჯერჯერობით ამ ხალხისგან გზავნილი, რომელიც ამა თუ იმ ფორმით მათ მისცემდა ხელისუფლების ოპონენტების სტატუსს საზოგადოების თვალში არ მოგვისმენია. არც გათავისუფლებაზე ამ ადამიანების, რომ განიმუხტოს კრიზისი. პოზიცია არ აქვთ არც ვადამდელ არჩევნებზე, არც უნდობლობაზე მთავრობის მიმართ, ამიტომ ამ ეტაპზე ნამდვილად ლეგიტიმურია ვერსია, რომ ეს არის ივანიშვილის გეგმა, რომ ვისაც სრხცვენია, რომ ღარიბაშვილს მისცას ხმა, იქნება ამას მისცეს, - განაცხადა „ევროპული საქართველოს“ ლიდერმა გიგა ბოკერიამ.

"ძალიან მძიმე შთაბეჭდილება დატოვეს ჩემზე თითოეული კომენტარით, იმიტომ, რომ თუ ნამდვილი ოპოზიციონერობა გინდა, მაშინ უნდა გასცე პასუხები ძალიან კითხვაზე და მათ ამ კითხვებზე არა თუ პასუხი გასცეს, არამედ ხელისუფლების პოზიციით ისაუბრეს" - აღნიშნა ენმ-ს წევრმა ხატია დეკანოიძემ.

მათი პირველი განცხადებები ძალიან გაურკვეველია და ძალიან ჰგავს ჩვეულებრივი „ქართული ოცნების“ განცხადებებს. ასე რომ, მითი იმის შესახებ, რომ გახარიამ გაიღვიძა და ამ 6 კაცმა გაიღვიძა და უცებ პროტესტის გრძნობა გაუჩნდათ, ამის ილუზია არ გვაქვს, ეს არის ჩვეულებრივი სათადარიგო სვლა ბატონი ივანიშვილის, - განაცხადა "სტრატეგია აღმაშენებლის" წევრმა სერგო ჩიხლაძემ.

შეგახსენებთ, გუშინ ოცნების დეპუტატებმა მმართველი გუნდი დატოვეს და გახარიას შეუერთდნენ, რომელიც ახალ პარტიას მალე წარუდგენს საზოგადოებას.

ოცნებიდან წასული დეპუტატები გიორგი ხოჯევანიშვილი, ალექსანდრე მოწერელია, ბექა ლილუაშვილი, შალვა კერესელიძე, ანა ბუჩუკური და მიხეილ დაუშვილი არიან.