"გუშინ ქართულმა სასამართლომ კიდევ ერთხელ ღიად და დაუფარავად განაცხადა, რომ ამ ინსტიტუტს არანაირი კავშირი არ აქვს სამართლიანობასთან და ის მხოლოდ ერთი კაცის ახირებას ემსახურება" - ასე აფასებს ერთიანი ნაციონალური მოძრაობის ერთ-ერთი ლიდერი ზალიკო უდუმაშვილი საქალაქო სასამართლოს გადაწყვეტილებას, რომლის თანახმადაც პარტიის თავმჯდომარე ნიკა მელია კვლავ პატიმრობაში დატოვეს.

"ჩვენ ვიხილეთ მორიგი სპექტაკლი, რომელიც სასამართლო დარბაზში დაიდგა და რომელიც უტყუარი მტკიცებულებაა, რომ მელია ივანიშვილის პატიმარია. მიუხედავად არაერთი მყარი მტკიცებულებისა, რომელიც დაცვის მხარემ წარადგინა, მოსამართლემ, უფრო სწორედ ბიძინა ივანიშვილმა მიიღო გადაწყვეტილება და ნიკა მელია მაინც პატიმრობაში დატოვა.

ჩვენ მოვისმინეთ სამართალდამცავების აღიარება როგორ ყალბდებოდა საქმეები, როგორ ავალებდნენ შსს მაღალჩინოსნები 20 ივნისის ღამეს გახმოვანების კაბელების ჩაჭრას და ბოლოს, ჩვენ მოვისმინეთ როგორ მიიღებოდა ქართული ოცნების ზედა ეშელონებში მელიასთვის პატიმრობის შეფარდების გადაწყვეტილება მანამ, სანამ სასამართლო ამას ოფიციალურად გამოაცხადებდა. ჩვენ გუშინ ვნახეთ ძალაუფლებას ჩაბღაუჭებული და უკიდურესად შეშინებული ხელისუფლება, რომელიც მზადაა ყველანაირი უკანონობა ჩაიდინოს ძალაუფლების შესანარჩუნებლად.

ჩვენ ასევე ვნახეთ გავრილოვის საქმეზე როგორ მიმდინარეობდა მელიას წინააღმდეგ საქმის შეთითხვნა. დაიწყო იმით, რომ 30 ათასიანი გირაო შეუფარდეს, შემდეგ სამაჯური გაუკეთეს და პოლიტკოსს გადაადგილებისა და საჯარო გამოსვლების უფლება შეუზღუდა.

ხშირად ისმის კითხვა, რატომ მოხდა პირველი გირაოს გადახდა. მაშინ მთავარი მიზანი - პროპორციული არჩევნები მიღწეული იყო და ამიტომ. შემდგომ 40 ათასიანი გირაოს დაკისრება იყო უკანონობის ჯაჭვი და სწორედ ამაზე თქვა ნიკამ უარი, ასე ფაუპირისპირდა ქვეყანაში გამეფებულ უკანონობას. ხელისუფლების მიზანია მელია იყოს განეიტრალებული და ეს პოლიტპატიმრები მერე სავაჭროდ გამოიყენოს დასავლელ პარტნიორებთან. მაგრამ ასე ვერ იქნება. პოლიტპატიმრები უპირობოდ უნდა გათავისუფლდნენ და ასეც მოხდება.

კრიზისის დაძლევის წინაპირობა სწორედ ესაა და ამ ნაბიჯის გადადგმა უნდათ თუ არა, ეს მაინც მოუწევთ"- აღნიშნა უდუმაშვილმა.