ოცნების დეპუტატი გივი მიქანაძე ნიკა მელიას პატიმრობაში დატოვების საკითხს ეხმაურება და აცხადებს, რომ ამ პროცესს მმართველი გუნდი გარედან უყურებს. მისი თქმით, ხელისუფლება აშენებს დემოკრატიულ სახელმწიფოს, სადაც კანონის უზენაესობა უმნიშვნელოვანესი პრინციპია:

„ეს არის ჩვეულებრივი პროცესი ერთი კონკრეტული ადამიანის მიმართ, რომელიც სხვა ბრალდებულებისაგან არაფრით განსხვავდება. ჩვენ ვაშენებთ ძლიერ, დემოკრატიულ სახელმწიფოს, სადაც კანონის უზენაესობა უმნიშვნელოვანესი პრინციპია. ჩვენ პატივს ვცემთ, პირველ რიგში, სასამართლოს დამოუკიდებლობას და იმ გადაწყვეტილებას, რომელსაც სასამართლო სამართლიანობისა და მხარეთა შეჯიბრებითობის პრინციპით იხილავს. სასამართლო მხარეების მიერ წარდგენილი არგუმენტებისა და ფაქტების საფუძველზე იღებს გადაწყვეტილებას. საკითხი, რომელიც სასამართლომ განიხილა, არის მისი პრეროგატივა.

მოსამართლის მიერ მიღებული გადაწყვეტილების ერთ-ერთი მოტივატორი ალბათ ის რისკები და კანონისადმი დაუმორჩილებლობაა, რასაც ამ ადამიანის მხრიდან ჰქონდა ადგილი. კანონის უზენაესობას ყველამ პატივი უნდა სცეს", - აცხადებს მიქანაძე.