უახლოეს დღეებში მოლაპარაკებების მესამე რაუნდი გაიმართება - კრისტიან დანიელსონი საქართველოში ბრუნდება

პოლიტიკა - 17:22, 12 Apr, 2021

1623

"ქართულმა ოცნებამ" დაადასტურა, რომ ევროპული საბჭოს პრეზიდენტის შარლ მიშელის პირადი წარმომადგენელი საქართველოში კრისტიან დანიელსონი უახლოეს დღეებში ისევ ჩამოვა. შესაძლოა, მმართველი გუნდი ამჯერად მაინც წავიდეს დათმობაზე. უმრავლესობის წევრები პრობლემურ საკითხებთან დაკავშირებით ამნისტიის გამოცხადების შესაძლებლობას არ გამორიცხავენ:

"ამნისტია არ არის ტაბუდადებული და წითელ ხაზზე გავლებული თემა. მასზე საუბარი შეიძლება, უბრალოდ, დაინიშნოს რიგგარეშე არჩევნები მხოლოდ იმიტომ, რომ ოპოზიციის ნაწილის მოლოდინები არ გამართლდა და მთელმა პლანეტა-დედამიწამ უთხრა ოპოზიციას, შედით პარლამენტში, უბრალოდ არ შეიძლება. ალოგიკურია და შეუძლებელია, შენს ამომრჩეველს ეს აუხსნა", - განაცხადა ოცნების დეპუტატმა დავით სერგეენკომ.

"შეიძლება, ეს არსებული დოკუმენტი, რაც ჩვენ ვიცით, როგორც ევროკავშირის დოკუმენტი, გარკვეულად დაიხვეწოს, ან უფრო კონკრეტული გახდეს. ამ თემებთან დაკავშირებით ჩვენ უკვე განვაცხადეთ, რომ გვაქვს ჩვენი რაციონალური მოსაზრებები, კომპრომისის შესაძლებლობაც", - აღნიშნა უმრავლესობის დეპუტატმა გია ვოლსკიმ.

დოკუმენტზე ხელმოწერის მზაობას გამოთქვამს პარლამენტის თავმჯდომარე არჩილ თალაკვაძეც, რომელმაც ოპოზიციას მოუწოდა, გადახედოს საკუთარ დამოკიდებულებას:

"დანიელსონის მოდერაციით გამართულ დიალოგზე ჩვენ მკაფიოდ ვთვქით, რომ მმართველი გუნდი, “ქართული ოცნება“ პრინციპულად მზად არის შეთანხმების დოკუმენტს ხელი მოაწეროს და დიალოგი პოზიტიურად დავასრულოთ. ამასთან დაკავშირებით ჩვენი მზადყოფნა არსებობს! იმედი მაქვს, ოპოზიცია საკუთარ პასუხებს და დამოკიდებულებას კიდევ ერთხელ გადახედავს და გარკვეულ ნაწილში გადააფასებს. სახეზეა საზოგადოებრივი აზრის კვლევები, რომლის მიხედვით, საზოგადოების დიდი ნაწილი ბოიკოტს მხარს არ უჭერს. ქვეყანაშიც სახეზეა ის საჭიროებები, რასაც პოლიტიკურმა სისტემამ უნდა უპასუხოს. ეს არის ეკონომიკის აღდგენის საჭიროება, სიღარიბის შემცირება, სამუშაო ადგილების შექმნის საჭიროება, პანდემიის და ვაქცინაციის პროცესის ეფექტურად მართვა და ჩვენი საერთაშორისო დღის წესრიგის განუხრელად განხორციელება, რაშიც მთელი პოლიტიკური სისტემის როლი არის მნიშვნელოვანი", - განაცხადა თალაკვაძემ პარლამენტის ბიუროს სხდომაზე.

შეგახსენებთ, რომ გუშინ ევროკავშირის ელჩი კარლ ჰარცელი სახელისუფლებო გუნდის წევრებს შეხვდა და ევროკავშირისგან მოსალოდნელ სანქციებზე ესაუბრა. როგორც დახურულ კარს მიღმა შემდგარი შეხვედრის შემდეგ გაირკვა, იმ შემთხვევაში, თუ მხარეებს შორის მოლაპარაკება არ შედგება, ევროკავშირის საქართველოსთან ურთიერთობას გადახედავს, რაც იმას ნიშნავს, რომ, შესაძლოა, საქართველოს ევროკავშირში გაწევრიანების პროცესი გაურკვეველი დროით გადაიდოს.