ოცნების დეპუტატი დავით სერგეენკო გირჩის შვიდპუნქტიან მოთხოვნას გამოეხმაურა და განაცხადა, რომ მათი მიდგომა არასერიოზულია. როგორც სერგეენკომ განაცხადა, პარლამენტში კანონპროექტის წარდგენას თავისი წესი აქვს და საკანონმდებლო ორგანო არ არის ნოტარიული ბიურო, სადაც რაღაცას შეუკვეთავ:

„მე არ გავცნობივარ „გირჩის“ პირობებს, თუმცა მოცემულობა ასეთია, რომ წინასწარ ულტიმატუმით საუბარი არ შეიძლება. მაგალითად, პარლამენტში შემოვალთ, ოღონდ ბანერთან დავდგებით და პლენარულ დარბაზში არ შევალთ - ნონსენსია. ისინი მოქმედი პარლამენტის წევრები არიან საქართველოს კონსტიტუციით და შეუძლიათ სტამბაში დაბეჭდონ და ნებისმიერ ადგილას დადგან ეს ბანერი და მის წინ გააკეთონ ეს განცხხადებები. ასეთი აბსურდული სელექტიურობა წარმოუდგენელია. ახლა მეორე, მარიხუანას ლეგალიზაციაზე იქნება თუ რაიმე სხვაზე, განათლების საკითხებზე, მით უმეტეს, პარლამენტში ნამუშევარმა ადამიანებმა არ შეიძლება არ იცოდნენ, რომ ეს არ არის ნოტარიული ბიურო, სადაც შეკვეთას აძლევ რაღაცისას. აქ შემოდის ნებისმიერი საკითხი, რომელიც გადის პირველად მსჯელობას კომიტეტებში და მერე არის პლენალურ სხდომაზე მსჯელობა, წინასწარ განატიები მოითხოვო, რომ შენი კანონპროექტი გავიდეს და ამიტომ შემოვა, მინიმუმ არასერიოზულია“, - განაცხადა სერგეენკომ.

შეგახსენებთ, გირჩმა გამოაქვეყნა 7 პუნქტი და განაცხადა, რომ ერთის შესრულების შემთხვევაშიც კი პარტია მზად არის, პარლამენტში შევიდეს.