უცნობის "კლასტერი" და ოპოზიციაზე განხორციელებული იერიში - რატომ შეუტია შაქარაშვილმა პოლიტიკურ ოპონენტებს?

პოლიტიკა - 13:54, 12 Apr, 2021

2440

უცნობის აქციის ორგანიზატორი ვატო შაქარაშვილი იმ პოლიტიკურ ოპონენტებს უპირისპირდება, რომლებმაც 9 აპრილს ჩატარებული აქცია გააკრიტიკეს.

შაქარაშვილმა სოციალურ ქსელში გამოქვეყნებულ პოსტში ოპოზიციონერ ეკა ბესელიას, გედევან ფოფხაძეს, ფიქრია ჩიხლაძესა და კახა კუკავას რევანშისტული ძალების ბალასტი უწოდა:
"აჰა რევანშისტული ძალების “ბალასტს” - გედი ფოფხაძეს, კუკავას, ბესელიას და ა.შ. როლიც მიანიჭეს... ეხლა წახვალთ და ,,უცნობს" დაარტყამთ, თქვენივე წარსულზე იტყვით უარს და უკადრებელს იკადრებთო... აბა ელექტორალური რესურსი თქვენ არ გაქვთ, ფინანსები თქვენ არ გაქვთ და მხოლოდ ტვირთად გვკიდიხართო...ფიქრია ჩიხრაძეზე რაღა უნდა ითქვას?! ეროვნული მოძრაობა და 1989 წლის 9 აპრილი ლაპარაკობს და თან კომკავშირის მდივნის პარტიის ლიდერია, რომელიც ანტისაბჭოთა მიტინგებს არბევდა... ამ მარაზმის დასრულების დასაწყისს ჩაეყარა გუშინ საფუძველი!"- დაწერა შაქარიშვილმა.
პარტია "სამართლიანობისთვის" ლიდერი ეკა ბესელია შაქარაშვილს ფულზე გაყიდულს უწოდებს და აცხადებს, რომ მას ცოტა ხნის წინ ფინანსური პრობლემები ჰქონდა, "ქართულმა ოცნებამ" კი ასეთი საქციელისთვის გროშები გადაუხადა:
"მე ვიცი, რომ მას ჰქონდა ფინანსური პრობლემები ცოტა ხნის წინ და როგორც ჩანს, მისი კომფორტი და მისი ასეთი გაყიდვა სულის იყიდეს იქ, სადაც ამისთვის გროშებს უხდიან „ქართულ ოცნებაში“ . ის ჩემს ოჯახში შემოდიოდა, ჩემს ირგვლივ ტრიალებდა და ვინ, ვინ და მან კარგად იცის, რომ დედამიწაზე არ არსებობს არავინ, სააკაშვილი ვინ არის, ვისაც ჩემზე ზეგავლენის მოხდენა შეუძლია და რამე გამაკეთებინოს. ეს მან იცის. უბრალოდ, იყიდეს იაფად იმისთვის, რომ ასე ილაპარაკოს. პატარა ბიჭმა ჯერ ვერც კი მოასწრო პოლიტიკაში გააზრება ისე დაასრულა და ალბათ რაღაცა გროშებად გაიყიდა ახლა მისი ღირსება", - აცხადებს ბესელია.
შეგახსენებთ, რომ 9 აპრილს ე.წ. მარადისობის აქციაზე უცნობმა ანტიოპოზიციური განცხადებები გააკეთა, რუსთაველზე დადგმულ კარვებს კი "ბინძური და სუნიანი" უწოდა და მათი აყრის სურვილი გამოთქვა.