"ევროპული საქართველოს" წევრმა გიორგი ღვინიაშვილმა ენმ-ს თავმჯდომარის ნიკა მელიას შესაძლო გათავისუფლებაზე ისაუბრა და განაცხადა, რომ თუ ხელისუფლება მას გაათავისუფლებს, ამით ქვეყანაში კრიზისი არ ამოიწურება. ის ასევე შეეხო მოლაპარაკებების მაგიდასთან კობახიძის ღარიბაშვილით შესაძლო ჩანაცვლაბის საკითხს და განმარტა, რომ ამ შემთხვევაში ეს იქნება ივანიშვილის მწვავე გზავნილი, რომლის მიხედვითაც მას არ სურს მოლაპარაკებები და სიტუაციის განმუხტვა:

"გონივრული ხელისუფლება მელიას საერთოდ არ დაიჭერდა, მაგრამ თუ ეს ნაბიჯი გადადგა, შემდეგ მალევე გამოუშვებდა. ჩვენ არ გვაქვს იმედი ხელისუფლების გონივრულობის, მათი ბოლო დროს გაკეთებული განცხადებებიდან გამომდინარე. თუ მოხდა ასე და ეს ნაბიჯი გადაიდგმება, რა თქმა უნდა, იქნება პოზიტიური, თუმცა ეს არ ნიშნავს, რომ მელიას გათავისუფლებით ყველანაირი კრიზისი ამოიწურება. დღეს მელია არის ჩვეულებრივი პოლიტიკური მძევალი და ნუ იფიქრებს ხელისუფლება, რომ მელიას გათავისუფლებით ყველა კრიზისი ამოიწურება, დაგვავიწყდება რურუას თემა ან რიგგარეშე არჩევნები, ამიტომ გავაგრძელებთ ბრძოლას, რომ ხელისუფლებას დავათმობინოთ ყველა საკითხი, რაც ჩვენი ქვეყნისთვის მნიშნველოვანია.

თუ დადასტურდა, რომ ღარიბაშვილი „ქართული ოცნების“ პარტიაში მთლიანად აიღებს ხელისუფლებას, ეს იქნება პირდაპირი გზავნილი, რომ ივანიშვილს არ უნდა მოლაპარაკებები და სიტუაციის განმუხტვა. ჩვენ უნდა გავაგრძელოთ მუშაობა უცხოელ პარტნიორებთან, ქვეყნის შიგნით მოსახლეობასთან და გავზარდოთ მუხტი, რათა ამ რადიკალურად განწყობილ ადამიანებს, ღარიბაშვილის თამადობით, დავათმობინოთ ყველა ის საკითხი მოლაპარაკებების მაგიდასთან, რაც სასიცოცხლოდ მნიშნველოვანია ჩვენი ქვეყნისთვის“, - განაცხადა გიორგი ღვინიაშვილმა.