ოცნების დეპუტატის დიმიტრი ხუნდაძის განცხადებით, ნაციონალური მოძრაობა და "ფანჩატურული ერთობის" გეგმაა, საქართველოში ეპიდვითარება გაუარესდეს. მისი განმარტებით, შეზღუდვების მოხსნის თაობაზე ქუჩაში დაუსაბუთებელი საპროტესტო აქციები ეწყობა, შეზღუვდების ამოქმედება კი იმაზეა დამოკიდებული, როგორ მოიქცევა მოსახლეობა:

"აქციები რა თქმა უნდა, ეპიდვითარებას დაამძიმებს, მაგრამ როგორც ჩანს, „ნაციონალური მოძრაობის" და ფანჩატურული ერთობის უდიდესი ნაწილის ინტერესშია ის, რომ ყველა მიმართულებით დამძიმდეს მდგომარეობა ქვეყანაში, რომ დაანთონ ცეცხლი და შემდეგ ნაცარში გაკოტრიალდნენ

შეზღუდვების გამკაცრება თუ მისი შემსუბუქება დამოკიდებულია ჩვენს ქცევაზე, თუ ჩვენი ქცევა იქნება იმდაგვარი, რომ მინიმალურ მოთხოვნებს შევასრულებთ, რაც რთული არ არის: მოვიხმართ პირბადეს, დავიცავთ ფიზიკურ დისტანციას, შესაბამის დროს ჩავიტარებთ ვაქცინაციას, რა თქმა უნდა, ეს რისკები შემსუბუქდება, ეპიდემიოლოგიური სტაბილურობა უფრო მეტად იქნება შესაძლებელი და ამ დროს საჭირო არ იქნება შეზღუდვები. შეზღუდვებისთვის არ არის საჭირო დაუსაბუთებელი აქციების მოწყობა ქუჩაში, არამედ საჭიროა დავიცვათ ის წესები, რომელსაც ყოველდღიურად გვახსენებენ დარგის სპეციალისტები, მაგრამ ჩვენ მათ ვივიწყებთ", - განაცხადა ხუნდაძემ.