"ჩვენ ვითხოვთ, ჩვენი უკანონო პატიმრების დაუყოვნებელ და უპირობო გათავისუფლებას", - ამის შესახებ სახელმწიფო მინისტრმა თეა ახლვლედიანმა განაცხადა.

ახვლედიანის განმარტებით, უკანონო პატიმრობაში მყოფი ზაზა გახელაძისა და ასევე, კიდევ რამდენიმე მოქალაქის დაუყოვნებელივ გათავისუფლების მიზნით, სახელმწიფო ინტენსიურად მუშაობს.

ინფორმაციას სახელმწიფო მინისტრის პრესსამსახური ავრცელებს:

"საქართველოში მიმდინარე ოკუპაციის და მისი უმძიმესი შედეგების გამო, დღეს სახეზეა ადამიანის უფლებების და ფუნდამენტური თავისუფლებების ძალიან უხეში დარღვევა, როგორც ოკუპირებულ რეგიონებში, ასევე საოკუპაციო ხაზის მიმდებარედ. ამის ერთ- ერთი გამოხატულება არის ჩვენი მოქალაქეების უკანონო დაკავებები. იცით, რომ დღეისათვის უკანონო პატიმრობაში ზაზა გახელაძესთან ერთად იმყოფება ჩვენი რამდენიმე მოქალაქეც, რომელთა დაუყოვნებელი და უპირობო გათავისუფლების მიზნით, ინტენსიურად ვმუშაობთ ყველა ჩვენს ხელთ არსებული ადგილობრივი თუ საერთაშორისი ინსტრუმენტის გამოყენებით. მათ შორის, ზაზა გახელაძის გათავისუფლების თემა იყო უმთავრესი, როგორც მარტის ბოლოს გამართული ინციდენტების პრევენციის და მათზე რეაგირების მექანიზმის შეხვედრაზე, ასევე ჟენევის საერთაშორისო მოლაპარაკების ფარგლებში. ამ უკანონო დაკავებების საკითხი არის ნამდვილად რთული და ჩვენ განვაგრძობთ მაქსიმალურ ძალისხმევას ამ მიმართულებით. ჩვენ ვითხოვთ ჩვენი უკანონო პატიმრების დაუყოვნებელ და უპირობო გათავისუფლებას"- განაცხადა სახელმწიფო მინისტრმა.