შერიგებისა და თანასწორობის საკითხებში სახელმწიფო მინისტრმა თეა ახვლედიანმა ზაზა გახელაძის უკანონო პატიმრობასთან დაკავშირებით ჟურნალისტებს განუცხადა, რომ საოკუპაციო რეჟიმთან პატიმრების გაცვლაზე საუბარი არ ყოფილა. ახვლედიანის განმარტებით, ქართული მხარე უკანონო პატიმრების დაუყოვნებლივ და უპირობო გათავისუფლებას ითხოვს:

"პირველ რიგში მე არ ვფლობ ამაზე ინფორმაციას, მეორე - საოკუპაციო რეჟიმთან ჩვენ მსგავს თემებზე არ ვსაუბრობთ და ჩვენ ვითხოვთ ჩვენი უკანონო პატიმრების დაუყოვნებლივ და უპირობო გათავისუფლებას.

საქართველოში მიმდინარე ოკუპაციის და მისი უმძიმესი შედეგების გამო, სახეზეა ძალიან უხეში დარღვევა ადამიანის უფლებების და ფუნდამენტური თავისუფლებების როგორც ოკუპირებულ რეგიონებში, ასევე, საოკუპაციო ხაზის მიმდებარედ და ერთ- ერთი გამოხატულებაა ჩვენი მოქალაქეების უკანონო დაკავებები. იცით, რომ დღეისათვის უკანონო პატიმრობაში ზაზა გახელაძესთან ერთად იმყოფება ჩვენი რამდენიმე მოქალაქეც, რომელთა დაუყოვნებელი და უპირობო გათავისუფლების მიზნით, ინტენსიურად ვმუშაობთ ყველა ჩვენს ხელთ არსებული ადგილობრივი თუ საერთაშორისი ინსტრუმენტის გამოყენებით, მათ შორის ზაზა გახელაძის გათავისუფლების თემა იყო უმთავრესი მარტის ბოლოს გამართული ინციდენტებისა პრევენციის და მათზე რეაგირების მექანიზმის შეხვედრაზე, ასევე, ჟენევის საერთაშორისო მოლაპარაკების ფარგლებში. საკითხი ამ უკანონო დაკავებების არის ნამდვილად რთული და განვაგრძობთ მაქსიმალურ ძალისხმევას,"- განაცხადა ახვლედიანმა.

შეგახსენებთ, რომ დე-ფაქტო ცხინვალის ციხეში მყოფი საქართველოს მოქალქის ზაზა გახელაძის ოჯახს უფლება დართეს, ოკუპირებულ საპატიმროში საოკუპაციო რეჟიმის ტყვე მოენახულებინათ. იქედან დაბრუნებული გახელაძის მეუღლე აცხადებს, რომ ზაზას იმედი ჰქონდა, ქართული მხარე რუს პატიმრებს მასში გაცვლიდა.