ინფექციური პათოლოგიის და შიდსის ცენტრის გენერალური დირექტორი თენგიზ ცერცვაძე სოციალურ ქსელში სამწუხარო ინფორმაციას ავრცელებს.

იგი ამბობს, რომ დიდი მეცნიერი გარდაიცვალა, რომელიც საქართველოს მეგობარი იყო.

“დიდი დანაკარგი მსოფლიოსა და საქართველოსთვის

69 წლის ასაკში გარდაიცვალა John Martin – მსოფლიო მნიშვნელობის მეცნიერი, ლიდერი და უბრალოდ დიდი პიროვნება, საქართველოს დიდი მეგობარი. ის გასული საუკუნის 90-იან წლებში ჩაუდგა სათავეში ფარმაცევტულ კომპანია „Gilead”-ს და მოკლე დროში გადააქცია იგი მსოფლიო გიგანტად, უპირობო ლიდერად აივ/შიდსის და ვირუსული ჰეპატიტების დარგში.

სწორედ John Martin-ის დამსახურებაა, რომ აივ/შიდსი სასიკვდილო დაავადებიდან გადაიქცა ქრონიკულ მართვად ინფექციად, ხოლო C ჰეპატიტი ახლო მომავალში ელიმინირებული იქნება მსოფლიოში და დიდად საამაყოა, რომ პირველი ქვეყანა, რომელიც ამას გააკეთებს, საქართველო იქნება. John Martin იყო საქართველოში C ჰეპატიტის ელიმინაციის უპრეცედენტო პროექტის სულისჩამდგმელი და დიდია მისი დამსახურება იმაში, რომ სწორედ საქართველო იქნა არჩეული C ჰეპატიტის ელიმინაციის მსოფლიოში პირველ სამოდელო ქვეყნად.

John Martin-ის სახელი ოქროს ასოებით ჩაიწერება მსოფლიო მედიცინის ისტორიაში და საბოლოოდ დაიდებს ბინას ქართველთა გულებში, რამეთუ მარტო ჩვენს ქვეყანაში მისმა შექმნილმა მედიკამენტებმა სიცოცხლე შეუნარჩუნა ათასობით აივ/შიდსით და 70 ათასზე მეტ C ჰეპატიტით ავადმყოფს.

John Martin-ს ძალიან უყვარდა საქართველო, არაერთგზის სტუმრობდა ჩვენს ქვეყანას და ყველაფერს აკეთებდა მის მხარდასაჭერად. მას დიდი გეგმები ჰქონდა, რომელთა ბოლომდე შესრულება, სამწუხაროდ ვერ მოასწრო. უფალმა დაუმკვიდროს ცათა სასუფეველი მის სულს.” – წერს თენგიზ ცერცვაძე.