დახურულ კარს მიღმა გამართული უმრავლესობის სხდომის დასრულების შემდეგ ირაკლი კობახიძემ მედიასთან გააკეთა კომენტარი და განმარტა, შეხვედრა გუშინდელი მოლაპარაკებების დეტალების გაცნობის მიზნით შედგა. კობახიძის თქმით, გუნდს აინტერესებდა სხვადასხვა ნიუანსები, რის გამოც მოლაპარაკება ვერ შედგა:

„აინტერესებდა გუნდს ეს დეტალები და ყველა ნიუანსზე გვქონდა საუბარი, რაც უკავშირდებოდა გუშინდელ დიალოგს. დანარჩენი საჯაროდაც გავრცელდა და იცით, რა ხდებოდა მოლაპარაკების გარშემო, ვინ აყენებდა ულტიმატუმებს და ვინ არა, ვინ იყო კონსტრუქციული და ვინ არა. იყო ოთხი თემა, რაზეც ჩვენ მსჯელობის გაგრძელების სურვილი გვქონდა, მაგრამ არც ერთთან დაკავშირებით ულტიმატუმი არ დაგვიყენებია. რაც შეეხება ოპოზიციას, იყო ორი ძირითადი ულტიმატუმი: ერთი, ეს იყო არჩევნების პლებისციტის თემა და მეორე - რურუას თემა. გარდა ამისა, ზოგიერთმა პარტიამ, მაგალითად, დააყენა ულტიმატუმის სახით მოთხოვნა იმასთან დაკავშირებით, რომ ყველა შემდეგი არჩევნები უნდა ჩატარებულიყო ნულოვანი ბარიერით. მაგალითად, ზურაბ ჯაფარიძემ დააყენა ეს. სხვებმა სხვა დამატებითი ულტიმატუმები დააყენეს. პირდაპირ იყო ნათქვამი, რომ თუ არ აისახებოდა მუდმივი ნულოვანი ბარიერი კონსტიტუციაში, ამ შემთხვევაში, ზურაბ ჯაფარიძე ხელს არ აწერდა დოკუმენტს. ეს არის ულტიმატუმი“, - განაცხადა კობახიძემ.