ნიკა მელიას მხრიდან გირაოს არგადახდა მისი პოლიტიკური დემარშია და ეს გასაგებიცაა... სხვა დანარჩენი სპეკულაციებია და გარკვეულ მიზანს ემსახურება

ნიკა მელიას მხრიდან გირაოს არგადახდა მისი პოლიტიკური დემარშია და ეს გასაგებიცაა... სხვა დანარჩენი სპეკულაციებია და გარკვეულ მიზანს ემსახურება - გია ხუხაშვილი

პოლიტიკა - 17:33, 30 Mar, 2021

1475

ნიკა მელიას გირაოს თანხის შეგროვებასთან დაკავშირებული საკითხი აქტუალური მას შემდეგ გახდა, რაც ფსიქოლოგთა განვითარების კვლევითი ცენტრის ხელმძღვანელი ბესიკ ბოგველი ინიციატივით გამოვიდა, რომ ენმ-ს თავმჯდომარეს გირაოს თანხას გადაუხდის, გაათავისუფლებს პატიმრობიდან და ამ ნაბიჯით საქართველო პოლიტიკური ჩიხიდან გამოვა.
რამდენად შეესაბამება სამართლებრივ ნორმებს აღნიშნული ინიციატივა, ეგ ცალკე საკითხია, რადგან იურისტების განცხადებით, მელიას გირაო მას შემდეგ გაუქმდა, რაც სასამართლომ მას აღკვეთის ღონისძიების სახით პატიმრობა შეუფარდა.
პოლიტოლოგმა გია ხუხაშვილმა ნიუპოსტთან საუბარში განმარტა, რომ მელიას მხირდან გირაოს გადახდაზე უარის თქმა მისი პოლიტიკური დემარშია, ხოლო იმ შემთხვევაში, თუ მაინც გადაიხდის, პროკურატურამ ხელახლა უნდა მიმართოს სასამართლოს, რათა პატიმრობის გადაწყვეტილება გადაიხედოს:
"როდესაც ოცნება ნიკა მელიას გირაოზე საუბრობს, ის გულისხმობს იმას, რომ, როგორც კი კეთილი ნება იქნება გამოხატული მელიას მხრიდან, პროკურატურა შესაბამისი შუამდგომლობით მიმართავს სასამართლოს და სასამართლო მიიღებს შესაბამის გადაწყვეტილებას. ტექნიკურად ალბათ ასე უნდა მოხდეს. შესაბამისად, მესამე პირების მხრიდან ფულის შეგროვება და ა.შ. ეს არის აბსურდი, ყველანაირად გაუგებარია, რადგან მელია იმიტომ კი არ იხდის გირაოს თანხას, რომ ფული არ აქვს, ეს არის მისი პოლიტიკური დემარში, რაც საკმაოდ კარგად არის გასაგები, აქედან გამომდინარე, ეს ყველაფერი არის სპეკულაცია. შეიძლება, იმ ადამიანს, ვინც ამას აკეთებს, თავისი მოტივები აქვს ან სხვა რამეშია საქმე, არ ვფიქრობ, რომ ჩვენ ამას დიდი ყურადღება უნდა მივაქცოთ. მთავარია, რომ მელიას პოლიტიკური ნება არ არის, რომ გირაო გადახადოს. თუ ასეთ ნებას გამოხატავს, ალბათ, ტექნიკურად ასე უნდა მოხდეს, რომ პროკურატურამ უნდა მიმართოს ხელმეორედ სასამართლოს აღკვეთის ღონისძიების შეცვლის თაობაზე და სასამართლომ უნდა მიიღოს შესაბამისი გადაწყვეტილება თავიდან" - განაცხადა ხუხაშვილმა.