ოცნების სამართლებრივი აბსურდი: ხელისუფლება ცრუობს, ნიკა მელიასთვის გირაოს გადახდა ავტომატურად გაუქმდა, როცა სასამართლომ პატიმრობა მიუსაჯა

პოლიტიკა - 16:02, 30 Mar, 2021

1249

იურისტი და ყოფილი თავდაცვის მინისტრი დიმიტრი შაშკინი ნიკა მელიას გირაოს შესახებ ოცნების მხრიდან გავრცელებულ სამართლებრივ აბსურდს ეხმაურება და აცხადებს, რომ თანხის გადახდის შესაძლებლობა აღარ არსებობს, რადგან პატიმრობის გადაწყვეტილებით გირაო ავტომატურად გაუქმდა. შაშკინის შეფასებით, ოცნება ახლაც ისევე ატყუებს საზოგადოებას, როგორც ეს 2012 წლის არჩევნებამდე იყო იმ დაპირებებით, რომლითაც ივანიშვილის გუნდი ხელისუფლებაში მოვიდა:

"ქართული ოცნება" ხელისუფლებაში ტყუილით მოვიდა, ეს იყო პარტია და მათი ლიდერები იყვნენ ადამიანები, რომლებიც პირდებოდნენ ხალხს უფასო ფულს. უკვე მეცხრე წელია, ასეთი ტყუილებით მართავენ ქვეყანას. რაც შეეხება ამ საკითხის იურიდიულ მხარეს, სასამართლომ მიიღო გადაწყვეტილება, რომლის მიხედვითაც ნიკა მელიას გირაო გაუუქმდა და ამ გირაოს ნაცვლად სასამართლოს განჩინებით მას პატიმრობა შეეფარდა. ეს მოხდა პროკურატურის შუამდგომლობით. ყველას ახსოვს, რომ სასამართლოს გადაწყვეტილება "ქართული ოცნების" ლიდერებმა მანამდე იცოდნენ, ვიდრე მოსამართლე განაჩენს გამოიტანდა. ახლა ისინი უნამუსოდ და უტიფრად ატყუებენ ხალხს და არწმუნებენ საზოგადოებას, რომ ნიკა მელიას შეუძლია, ნებისმიერ დროს გადაიხადოს გირაო და გათავისუფლდეს პატიმრობიდან. ეს ძალიან დიდი ტყუილია. სასამართლომ გირაო გააუქმა და ამის ნაცვლად შემოიღო პატიმრობა, აქედან გამომდინარე, ხვალ ვინმეს რომც მოუნდეს გირაოს გადახდა, ამის შესაძლებლობა აღარ არსებობს, იმიტომ, რომ გირაო გაუქმებულია და ამის ნაცვლად მიღებულია პატიმრობის გადაწყვეტილება.

აქ არის ორი ვარიანტი - ან საქართველოს მთავრობა არის ამ ქვეყანაში სასამართლო, რომელსაც ჰქვია კობახიძე-მდინარაძე-ღარიბაშვილი-თალაკვაძე ან უტიფრად იტყუებიან. ყველამ კარგად ვიცით, რომ ეს ადამიანები არ არიან სასამართლოს ინსტიტუცია და იურისპუდენციაში შეუძლებელია, რომ მდინარაძის ნათქვამის გამო ვინმეს შეეძლოს გირაოს შეტანა ან არ შეტანა, ყველა ვხვდებით, რომ ეს არის ოცნების მორიგი ტყუილი. ესენი ცდილობენ, შეცდომაში შეიყვანონ საზოგადოება. აქ ხომ საუბარი არ არის მარტო იმაზე, რომ მელია პოლიტპატიმარია, მისი დაჭერის შემდეგაც ურცხვად ექცევიან საზოგადოებას. როგორც იურისტი, ვამბობ, რომ ასეთი ფაქტი ფიზიკურად ვერ მოხდება" - აცხადებს შაშკინი.
შეგახსენებთ, რომ სახელისუფლებო გუნდის ლიდერები ოპოზიციის მოთხოვნას ნიკა მელიას გამოშვების თაობაზე არ იზიარებენ და აცხადებე, რომ მელიას დღესვე შეუძლია საპატიმროს დატოვება, თუ ის გირაოს თანხას გადაიხდის.