ენმ-ს თავმჯდომარის ნიკა მელიას ადვოკატის დიმიტრი საძაგლიშვილის განცხადებით, მელიასთვის გირაოს გადახდა შეუძლებელია, რადგან სასამართლოს მიერ პატიმრობის შესახებ გადაწყვეტილება ავტომატურად აუქმებს გირაოს გადახდის შესაძლებლობას. საძაგლიშვილის განცხადებით, ეს არის ქართული ოცნების მორიგი ტრიუკი, რითაც საზოგადოება შეცდომაში შეყავს:

"რეალურად ნიკა მელიასთვის შეფარდებული გირაო ბუნებაში აღარ არსებობს. იმიტომ, რომ როდესაც ხდება პატიმრობის შესახებ გადაწყვეტილების მიღება, ამით უქმდება მანამდე მიღებული გადაწყვეტილება გირაოთი გათავისუფლების შესახებ. რაც გულისმობს იმას, რომ ფიზიკურად და ტექნიკურად შეუძლებელია ამ გირაოს გადახდა. ეს არის უბრალოდ "ქართული ოცნების" მიერ მოფიქრებული ტრიუკი, რომელიც გათვლილია ჩვენს დასავლელ მეგობრებზე, რათა წარმოაჩინონ, რომ თითქოს მათი მიზანი არ არის მელიას პატიმრობაში ყოფნა და მელიას გათავისუფლება დამოკიდებულია თვითონ მელიას ნებაზე. რაც შეეხება თავად გირაოს გადახდას ნებისმიერი სხვა პირის მიერ, კიდევ მინდა ხაზი გავუსვა იმ გარემოებას, რომ ეს გირაო აღარ არსებობს. ესაა სამართლებრივი აბსურდი, - განაცხადა საძაგლიშვილმა.

როგორც უფლებადამცველმა განმარტა, მელიას გათავისუფლებისთვის არსებობს ორი ვარიანტი - პროკურატურამ მოითხოვოს აღკვეთის ღონისძიების გაუქმება და შესაბამისად, გაუუქმდეს პატიმრობა და მეორე - სასამართლომ, რომელსაც ორი თვის ვადაში უწევს ამ გადაწყვეტილების გადახედვა, თვითონვე შეცვალოს გადაწყვეტილება და გაათავისუფლოს ნიკა მელია.