"მოვითხოვთ, რომ სასწრაფოდ მოწვეული იყოს საერთაშორისო ექსპერტები და მოხდეს გასაჯაროება, რა გეგმა გააჩნია ხელისუფლებას გელათის გადასარჩენად" ,- აცხადებს ქუთაისის საკრებულოს ოპოზიციონერი დეპუტატის გიგა შუშანია.

მისი თქმით, იმ დროს, როდესაც კულტურის ახალი მინისტრი განსხვავებული აზრის დევნით არის დაკავებული, გელათის უნიკალური ფრესკები ნადგურდება.

"მაშინ, როდესაც გელათი ნადგურდება, წულუკიანის პრიორიტეტი არის განსხვავებული აზრის დევნა. ჩვენ მოვითხოვთ, რომ სასწრაფოდ მოწვეული იყოს საერთაშორისო ექსპერტები და მოხდეს გასაჯაროება, რა გეგმა გააჩნია ხელისუფლებას გელათის გადასარჩენად. დროულად უნდა დაიდოს გეგმა რას აპირებენ, წინააღმდეგ შემთხვევაში, სავალალო შედეგი დადგება", -განაცხადა გიგა შუშანიამ.

"ევროპა ჩემი სახლიას" წევრი, თორნიკე ბარათაშვილი , აცხადებს , რომ გელათში რაღაც გასაიდუმლოებულ რეჟიმში მიდიოდა იქ სამუშაოები, რაზეც ინფორმაციას ამ დრომდე არ ავრცელებს სააგენტო.

"სააგენტო გვეუბნებოდა, რომ გამოშრობამდე იქ არაფერი არ მოხდებოდა, გამოშრობა რა თქმა უნდა ჯერ დასრულებული არ არის და ამის გარანტიას ვერავინ გვაძლევს, თუმცა რაღაც გასაიდუმლოებულ რეჟიმში მიდიოდა იქ სამუშაოები, რაზეც ინფორმაციას ამ დრომდე არ ავრცელებს სააგენტო. არაფერი არ იცვლება, არაა გამოვლენილი არცერთი პასუხისმგებელი პირი", - ამბობს ბარათაშვილი.