"ქართული ოცნების" წევრი, სოზარ სუბარი ოპოზიციას მიმართავს და აფრთხილებს, რომ " 2024 წლამდე მათი ადგილი ამ პოლიტიკაში არ დარჩება, თუ ახლა პარლამენტში არ შემოვლენ" - მისივე თქმით, მათი სახელი დავიწყებას მიეცემა და ოპოზიციური ველი მოსუფთავდება.

სუბარი თვლის , რომ ოპოზიციას არ სურს მედიატორი და საქართველოს მეგობრების ჩართულობა, არამედ უნდათ, იდგნენ "ქუჩაში, იყვირონ და სასტვენებით უსტვინონ“.

"ჩვენი მხრიდან მაქსიმალური ნაბიჯია გადადგმული. ჩვენ მზად ვართ ვადამდელი არჩევნებისთვის, თუ არჩევნები გაყალბდა. თუ არ გაყალბდა, მსოფლიოში არ არსებობს პრეცედენტი, რომ მთავრობა ფუნქციონირებდეს, ვიღაცას შედეგი არ მოსწონდეს, ამის გამო არჩევნები ტარდებოდეს. მართლა ვეუბნები ოპოზიციას, კიდევ ერთხელ მივმართავ, 2024 წლამდე მათი ადგილი ამ პოლიტიკაში არ დარჩება, თუ ახლა პარლამენტში არ შემოვლენ იმიტომ, რომ ქუჩაში დარჩებიან. მათ ადგილს სხვები დაიკავებენ, მე მათ ვაფრთხილებ.

თუკი ოპოზიცია არ შემოვა პარლამენტში, უბრალოდ, მათი სახელი დავიწყებას მიეცემა, ოპოზიციური ველი მოსუფთავდება და ახალი ოპოზიციური პარტიები აღმოჩნდებიან, რომლებიც 2024 წლის არჩევნებში მონაწილეობას მიიღებენ. კარგი იქნება, ეს გაითავისოს და გაითვალისწინოს ყველა ოპოზიციონერმა ლიდერმა, მათმა მხარდამჭერებმაც და მთლიანად პარტიებმა. თუმცა, მხარდამჭერებს რაც შეეხება, როგორც ჩანს, მათ ეს გათავისებული აქვთ, ამაზე მეტყველებს ყველა კვლევა“,-განაცხადა სუბარმა.

როგორც მან აღნიშნა, არჩევნების გაყალბებაზე ეჭვი რომ ჰქონდეს ადამიანებს, მაშინ ოპოზიციის მიერ ორგანიზებულ აქციებზე „ქუჩაში არა 300 კაცი, არამედ 300 000 იქნებოდა“.

"არანაირი ჩიხი არ არსებობს, ეს არის კრიზისის შექმნის მცდელობა“,- განაცხადა სუბარმა "პატირა ნიუსში".