მიდის თუ არა ხელისუფლება კომპრიმისზე ოპოზიციასთან და შესაძლებელია თუ არა ვადამდელი არჩევნების დანიშნვა?

იმ შემთხვევაში, თუ ხელისუფლების ოპონენტები პარლამენტში შევლენ, შექმნიან საგამოძიებო კომისიას, გამოძიების პროცესს თავად უხელმძღვანელებენ და არჩევნების შედეგებში 1%-ან ცდომილებას გამოავლენენ, ოცნება მზად არის ვადამდელი არჩევნები დანიშნოს - ამის შესახებ საგარეო საქმეთა მინისტრმა დავით ზალკალიანმა ჟურნალისტებთან ისაუბრა. მისი განმარტებით, ხელისუფლება კომპრომისისთვის მზად არის და ამას საერთაშორისო პარტნიორებიც ხედავენ:

"თუკი ოპოზიციური პარტიები შემოვლენ პარლამენტში არის მზაობა, შეიქმნას საგამოძიებო კომისია და საგამოძიებო კომისიის ფარგლებში თვითონ ოპოზიციური პარტიები იყვნენ წამყვანი. ჩატარდეს ყოვლისმომცველი გამოძიება და 1% შეცდომის აღმოჩენის შემთხვევაში, არის მზაობა რომ დაინიშნოს ადრეული არჩევნები.

პოლიტპატიმრების საკითხი ესე არ დგას, იქ არის საკითხი დაკავშირებული ერთიანი ნაციონალურ მოძრაობის ლიდერის დაკავებასთან და ამ მიმართულებითაც პოზიცია ცალსახაა. მზაობა არა ერთხელ იყო დაფიქსირებული, რომ ნებისმიერ მომენტში, როდესაც გადახდილი იქნება გირაო, ნებისმიერ მომენტში, ის იქნება გათავისუფლებული", - განაცხადა ზალკალიანმა.