"ნაციონალური მოძრაობის" ბათუმის საკრებულოს წევრის ნოდარ დუმბაძის განცხადებით, მას აქვს უტყუარი ინფორმაცია, რომ აჭარის მთავრობის მეთაური თორნიკე რიჟვაძე გადადგომის შესახებ განცხადებას დღეს გააკეთებს. მისი თქმით, რიჟვაძე არ არის ღარიბაშვილის კადრი და თანამდებობას ამის გამო ტოვებს:

"თორნიკე რიჟვაძის გადადგომის შესახებ ინფორმაცია "ქართული ოცნებიდან" მოდის. ხშირად საუბრობენ ამაზე. გუშინაც მქონდა შეხვედრა ადამიანებთან, რომლებმაც დამიდასტურეს. ამის შემდეგ გავავრცელე ეს ინფორმაცია. ჩემი ინფორმაციით, თორნიკე რიჟვაძე დღეს აპირებს გადადგომას" - განაცხადა დუმბაძემ.

რიჟვაძის პრესსამსახური აღნიშნულ ინფორმაციას უარყოფს და აცხადებს, რომ აჭარის მტავრობის ხელმძღვანელი დღეს ჩვეულ რეჟიმში განაგრძობს მუშაობას, თუმცა, ნოდარ დუმბაძის მტკიცებით, მისმა წყარომ ინფორმაცია დაზუსტებულ გარემოებაში მისცა.