გაერთიანებული სამეფოს მთავრობის ოფიციალურ ვებ-გვერდზე გამოქვეყნდა ინფორმაციას, რომლის მიხედვითაც, დღეს დაგეგმილ ნატო-ს მინისტერიალის შეხვედრაზე, გაერთიანებული სამეფოს საგარეო და თანამეგობრობის საქმეთა სახელმწიფო მდივანი დომინიკ რააბი მხარს დაუჭერს ნატო-ს ღია კარის პოლიტიკას, რომელიც ხსნის გზას ნატო-ს წევრობისკენ, მათ შორის, რუსული აგრესიის წინაშე მდგარი ისეთი ქვეყნებისთვის, როგორიცაა უკრაინა და საქართველო.

რააბმა შეხვედრის დაწყებამდე გააკეთა კომენტარი და განაცხადა, რომ ეს შეხვედრა მნიშვნელოვან შესაძლებლობას აძლევს მოკავშირეებს ერთად დასხდნენ და განიხილონ, თუ რა ღირებულება აქვს ალიანსს დღევანდელ სამყაროში, სადაც დემოკრატიული სახელმწიფოები იმ ავტორიტარული სახელმწიფოების თუ არასახელმწიფო აქტორებისგან მომდინარე საფრთხეების წინაშე დგანან, რომლებიც კიბერთავდასხმებსა და სხვა ტექნოლოგიებს წესებზე დამყარებული მსოფლიო წესრიგის საბოტირების მიზნით იყენებენ.

"გაერთიანებული სამეფო, როგორც თავდაცვისა და დიპლომატიის კუთხით უდიდესი პოტენციალის მქონე წამყვანი სახელმწიფო, სრულად უჭერს მხარს ნატო-ს, რომელიც წარმოადგენს რუსეთიდან მომდინარე საფრთხეების მძლავრ შემაკავებელ მექანიზმს და ასევე, მტკიცე და ერთიან პოლიტიკურ ბასტიონს მოსკოვის მადესტაბილიზებელი ქმედებებისგან თავდასაცავად“, - ნათქვამია გაერთიანებული სამეფოს მთავრობის ვებ-გვერდზე გამოქვეყნებულ პრეს-რელიზში.