NATO-ში აშშ-ის ელჩის მოვალეობის შემსრულებლის, დაგლას ჯოუნსის განცხადებით, ამერიკა და NATO რეფორმების განხორციელების კუთხით საქართველოს მხარდაჭერას აგრძელებენ, რათა ქვეყანა რეფორმების გზით NATO-ში გაწევრიანების უფრო ძლიერი კანდიდატი გახდეს.

მან ასევე, განაცხადა, რომ NATO-ში გაწევრიანების გზაზე სუვერენული ქვეყნის გადაწყვეტილებას ხელი სხვა რომელიმე ქვეყანამ არ უნდა შეუშალოს.

"აშშ NATO-ს ღია კარის პოლიტიკის ძალიან მტკიცე მხარდამჭერია. ამერიკასა და ჩრდილოატლანტიკური ალიანსის ყველა მოკავშირეს მიაჩნია, რომ თითოეული ქვეყნის სუვერენული უფლებაა გადაწყვიტოს, რომელ ორგანიზაციას დაუკავშიროს ქვეყნის მომავალი.

საქართველო ალიანსის ძლიერი მოკავშირე, ხანგრძლივი პარტნიორი და NATO-ს ოპერაციების მონაწილეა. NATO და აშშ საქართველოს მხარდაჭერას აგრძელებს, რათა დემოკრატიული ინსტიტუტების რეფორმის განხორციელება გაძლიერდეს. ამ რეფორმების გზით კი ქვეყანა, NATO-ში გაწევრიანების უფრო ძლიერი კანდიდატი გახდეს", - განაცხადა დაგლას ჯოუნსმა.