ბათუმის მაჟორიტარი დეპუტატი და ოცნების გუნდის წევრი რესან კონცელიძე გახარიას გუნდში გადასვლის შესახებ დღეს გავრცელებულ ინფორმაციას უარყოფს და აცხადებს, რომ მსგავსი შეთავაზება არ ჰქონია. მისი განმარტებით, ის ბათუმელებმა "ქართული ოცნებიდან" აირჩიეს და მათ წინაშე ვალდებულებები გააჩნია:

"მე ვარ ბათუმის მაჟორიტარი და არავითარი შემოთავაზება არ მქონია. ბათუმელებმა "ქართული ოცნებიდან" ამირჩიეს და ვალდებულებები მათ მიმართ მაქვს. ვალდებულებების ერთგული ვრჩები, გავაგრძელებ "ქართული ოცნების" გუნდში მუშაობას და არ ვაპირებ სხვა გუნდში გადასვლას. ჩემთვის გაუგებარია რატომ მოხვდა ჩემი სახელი და გვარი იმ სიაში, რომელიც გავრცელდა. ბატონი გიორგი ჩემი მინისტრი იყო", - განაცხადა რესან კონცელიძემ.

შეგახსენებთ, რომ ყოფილმა პრემიერმა გადადგომის შემდეგ ჟურნალისტებთან პირველი კომენტარი გააკეთა და განაცხადა, რომ პოლიტიკიდან არსად მიდის. დღესვე გამჟღავნდა იმ პირთა სავარაუდო ვინაობა, რომლებსაც გახარიას გუნდში უახლოეს პერიოდში იხილავს საზოგადოებას. სიის მიხედვით, ერთ-ერთი სწორედ რესან კონცელიძე იყო.