ოცნების დეპუტატი კახა კახიშვილი ყოფილი პრემიერის გიორგი გახარიას განცხადებას გამოეხმაურა და აღნიშნა, რომ ის გადაწყვეტილება, რომელიც მისგან მოისმინა, ერთ დღეში ვერ მიიღება. კახიშვილი არ იმასც გამორიცხავს, რომ ნიკა მელიას საკითხი არ იყო გარდამტეხი:

"ის, რაც გიორგი გახარიამ განაცხადა მოსალოდნელი იყო. გიორგი გახარია ის ადამიანია, რომელმაც მმართველობის პერიოდში გარკვეული მხარდამჭერები - უშუალოდ მისი მხარდამჭერები მოიზიდა. შესაბამისად, ჩათვალა, რომ დივიდენდები, რაც მას გააჩნია, არ უნდა დაეკარგა. პოლიტიკაში მაინც და მაინც ასე არ ხდება, როცა ყველას წარმატებული მხარდაჭერა აქვს. გიორგი გახარიამ საკუთარი ქარიზმით, კარგი კითხვა-პასუხებით მიაღწია იმას, რომ მხარდამჭერთა მობილიზაცია მოახდინა. ალბათ მან დღეს უკვე ჩათვალა, რომ პოლიტიკაში უნდა დარჩეს. ჩემი აზრით, ასეთი გადაწყვეტილებები ერთ დღეში არ მიიღება. როგორც ჩანს, არც ნიკა მელიას საკითხი იყო გარდამტეხი. შეიძლება ნიკა მელიას საკითხი იყო ერთ-ერთი გადაწყვეტილების მისაღებად, თუმცა მხოლოდ ეს “ქართული ოცნებიდან“ წასვლის მიზეზი ვერ იქნებოდა. ალბათ ასეთი გეგმა არსებობდა და ნიკა მელიას დაკავების ოპერაცია ერთ-ერთი საკვანძო წერტილი იყო, როცა გახარიამ “ქართული ოცნებისა“ და პრემიერ-მინისტრის თანამდებობის დატოვების გადაწყვეტილება მიიღო. შესაბამისად, ვიღაც გაყვება, ვიღაც არ გაყვება, შეიძლება გახარიას ისეთი ადამიანებიც შეუერთდნენ, რომლებიც პარლამენტში მისი რეკომენდაციით არ შესულან“, - დასძინა კახა კახიშვილმა.

შეგახსენებთ, რომ ყოფილმა პრემიერმა გადადგომის შემდეგ ჟურნალისტებთან პირველი კომენტარი გააკეთა და განაცხადა, რომ პოლიტიკიდან არსად მიდის.