ივანიშვილის "ახალი ლიდერი" ოლიგარქის საარჩევნო ყულაბისთვის

ივანიშვილის "ახალი ლიდერი" ოლიგარქის საარჩევნო ყულაბისთვის - გახარიას პოლიტიკური მომავალი

პოლიტიკა - 13:36, 22 Mar, 2021

2441

ყოფილი პრემიერის გიორგი გახარიას განცხადებას ოპოზიციური სპექტრი გამოეხმაურა. ხელისუფლების ოპონენტების თქმით, 20 ივნისის შემოქმედს ძლიერ ძალად ვერ აღიქვამენ და აცხადებენ, რომ ის ბიძინა ივანიშვილის მიერ იქნება მართული:
"იმ შემთხვევაში, თუ გახარია დარჩება პოლიტიკაში და გადაწყვეტს ახალი ძალის შექმნას, ჩვენ ყველას კარგად გვახსოვს, რომ იგი არის მთავარი შემოქმედი 20 ივნისის ღამის, ეს რა თქმა უნდა, დააზიანებს ქართულ ოცნებას, ისევე როგორც დააზიანა თავისი გადადგომით, მაგრამ მისი სახით ძლიერ ძალას ვერ ვხედავ" - განაცხადა ენმ-ს წევრმა ხატია დეკანოიძემ.

'სარეზერვო ფიგურა გამოიყვანა ივანიშვილმა, რომელსაც ექნება გარკვეული ფინანსები და შეეცდებიან, მისგან შექმნან ახალი ლიდერი, რომელიც საბოლოოდ ივანიშვილის ყულაბაში ჩაყრის ხმებს. გახარიას ადგილი პოლიტიკაში არაა, ის უნდა იჯდეს მის თანამზრახველებთან ერთად პროკურორის კაბინეტში და ჩვენებას უნდა აძლევდეს იმ დანაშაულებების გამო, რომელმაც ეს ქვეყანა ჩამოაქცია" - განაცხადა ლეიბორისტული პარტიის წევრმა გიორგი გუგავამ.
"ძალიან ნათლად უნდა გაავლოს ხაზი პირველ რიგში ივანიშვილის პოლიტიკურ ორბიტაზეა თუ რეალურად აპირებს ბრძოლას ხელისუფლებასთან. ან შეიძლება, აქ საქმე გვაქვს ხელისუფლების შიგნით დაპირისპირებასთან, დაველოდოთ რა იქნება, ფაქტია, რომ ქართულ ოცნებაში სერიოზული რღვევა არის დაწყებული" - აღნიშნა დემოკრატიული საქართველოს ერთ-ერთმა ლიდერმა ანზორ ბიწაძემ.
შეგახსენებთ, რომ ყოფილმა პრემიერმა გადადგომის შემდეგ ჟურნალისტებთან პირველი კომენტარი გააკეთა და განაცხადა, რომ პოლიტიკიდან არსად მიდის.