ევროკავშირთან საქართველოს მისიის ხელმძღვანელის, ნატალია საბანაძის თანამდებობიდან გადადგომას ოპოზიციაში ეხმაურებიან. ხელისუფლების ოპონენტები საბანაძის წასვლას ქვეყნის საგარეო კურსის ცვლილებას უკავშირებენ, რაც ჩვენი ელჩისთვის მიუღებელი აღმოჩნდა:

"როგორც ჩანს, მას ძალიან მტკიცედ აქვს განცდა, რომ დღევანდელმა ხელისუფლებამ შეიცვალა საგარეო პოლიტიკური კურსი" - განაცხადა სამადაშვილმა.

"ფაქტი ერთია, რაც არ უნდა იყოს მიზეზი, ევროკავშირში ჩვენი ელჩის გადადგომა დასავლური ღირებულებების ფეხქვეშ გათელვის შემდეგ ნიშნავს ძალიან მძიმე ფორმულას - ჩვენი ქვეყნის საგარეო ორბიტა ბრუნდება რუსეთისკენ" - განაცხადა ენმ-ს წევრმა ხატია დეკანოიძემ.

"სრულიად ნათელია, რომ გადადგომა უკავშირდება იმ ვითარებას, იმ მოლაპარაკებებს, რომელიც დღეს არის ოპოზიციასა და ხელისუფლებას შორის ევროკავშირის მედიაციით და გამოხატავს იმ ძალიან რთულ მდგომარეობას, რომელშიც შევიდა ხელისუფლება" - განაცხადა ევროპული საქართველოს ლიდერმა გიგი წერეთელმა.