"ოცნებისა" და ოპოზიციის თითქმის ათსაათიანი შეხვედრა უშედეგოდ დასრულდა

პოლიტიკა - 00:40, 19 Mar, 2021

1279

ევროპული საბჭოს პრეზიდენტის, შარლ მიშელის პირადი წარმომადგენლის, კრისტიან დანიელსონის მედიაციით, "ქართული ოცნებისა" და ოპოზიციის თითქმის ათსაათიანი შეხვედრა დასრულდა.

დანიელსონის მიერ გაკეთებული განცხადებით, მიუხედავად იმისა, რომ მიშელის 6-პუნქტიანი დოკუმენტის გარკვეულ პუნქტებზე პოზიციები დაახლოვდა, საბოლოო შეთანხმების მიღწევა ვერ მოხერხდა.

დანიელსონი აცხადებს, რომ იგი ტოვებს თბილისს, რათა შარლ მიშელს მიაწოდოს ინფორმაცია დიალოგის შესახებ. მას იმედი აქვს, რომ ქართველი პოლიტიკური ლიდერები მოახერხებენ საერთო ენის გამონახვას.

ოპოზიციის შეფასებით, მიუხედავად იმისა რომ მათი მხრიდან იყო სრული მზაობა შეთანხმების მისაღწევად, მაგრამ ოცნება არ იყო მზად კომპრომისისთვის და მათ გამოავლინეს სიხისტე მოლაპარაკებების დროს.

გიგა ბოკერიას განცხადების თანახმად, სრული შეთანხმების მიღწევა ვერცერთ საკითხზე მოხერხდა, მაგრამ განსაკუთრებული წინააღმდეგობა ოცნების მხრიდან პოლიტპატიმრებისა და ვადამდელი არჩევნების საკითხზზე გამოიჩინა.

ოპოზიციური პარტიები ხვალ გეგმავენ შეხვედრის გამართვას, რათა სამომავლო გეგმების შესახებ შეთანხმდნენ.