მთავრობის სხდომაზე საქართველოს პრემიერ-მინისტრმა ირაკლი ღარიბაშვილმა ბრიუსელში გამართული შეხვედრები შეაფასა და აღნიშნა, რომ ვიზიტი წარმატებული იყო.

ღარიბაშვილის თქმით, ევროპელმა პარტნიორებმა საქართველოში არსებული პოლიტიკური რეალობა შეაფასეს. პრემიერმა არსებულ კრიზისს ხელოვნურად შექმნილი უწოდა, რომლის საფუძველიც არ არსებობს:

"ჩვენ მოვისმინეთ ბორელის შეფასება ჩვენი ქვეყნის პოლიტიკური რეალობისა და სიტუაციის. ასევე ჩვენ მოვისმინეთ მათი შეფასებები არჩევნების, რომელიც მათი შეფასებით, ჩატარდა სამართლიან, თავისუფალ და კონკურენტულ პირობებში. აქედან გამომდინარე, მე მინდა კიდევ ერთხელ ვთქვა, რომ არავითარი საფუძველი არ არსებობს ხელოვნურად შექმნილი პოლიტიკური კრიზისისა, შესაბამისად, მე მინდა კიდევ ერთხელ, დღეს მოვუწოდო ყველა მხარეს, რომ ჩვენ მაქსიმალურად მოკლე დროში შევძლოთ კონსტრუქციული დიალოგის ფარგლებში გამოსავლის მოძებნა იმისთვის, რომ ქვეყანა დაუბრუნდეს ნორმალურ პოლიტიკურ ცხოვრებას და გავაგრძელოთ ისეთ დიდ გამოწვევებზე კონცენტრირება, როგორიც არის კოვიდპანდემია, ეკონომიკური პრობლემები, უმუშევრობა, ოკუპაცია და ა.შ. მით უმეტეს, რეგიონში გართულებული უსაფრთხო გარემოს ფონზე.

იმედი მაქვს, რომ ოპოზიციის კონსტრუქციული ნაწილი მიიღებს გონივრულ, სახელმწიფოებრივ გადაწყვეტილებას ამ დღეების განმავლობაში. ჩვენი მხრიდან კიდევ ერთხელ ვადასტურებთ მზაობას იმისთვის, რომ გავაგრძელოთ კონსტრუქციული დიალოგი და რაც შეიძლება მოკლე დროში მივიღოთ შესაბამისი შეთანხმება,"- განაცხადა ირაკლი ღარიბაშვილმა.