ევროპარლამენტის პრეზიდენტმა დევიდ სასოლიმ პრემიერმინისტრ ღარიბაშვილთან, ხოლო შემდგომ ევროკავშირის ელჩ, კარლ ჰარცელთან შეხვედრის შემდეგ საქართველოს საკითხებზე მომუშავე ევროპარლამენტარებს არაფორმალური საკონტაქტო ჯგუფის შექმნა შესთავაზა.

კერძოდ, სასოლის ინიციატივით შექმნილ ჯგუფში ევროპარლამენტარები: პეტრას აუსტრევიჩუსი, ანდრიუს კუბილიუსი, მარინა კალიურანდი, სვენ მიქსერი და მაიკლ გალერი იქნებიან - სწორედ მათთან შეხვედრის დროს წამოაყენა სპეციალური ჯგუფის შექმნის ინიციატივა ევროპარლამენტის პრეზიდენტმა.

ევრონესტის საპარლამენტო ასამბლეის თავმჯდომარე, ანდრიუს კუბილიუსი, აცხადებს, რომ პრეზიდენტ სასოლის ინიციატივა საქართველოში არსებული პოლიტიკური კრიზისის გადაჭრას უკავშირდება.

"ევროპარლამენტის პრეზიდენტმა ბატონმა სასოლიმ მოგვიწვია ევროკავშირის ელჩ კარლ ჰარცელთან ერთად. გავცვალეთ მოსაზრებები, თუ როგორ ვითარდება მოვლენები. ძალიან გვინდა, რომ შარლ მიშელის მისია, რომლის მიზანიც კრიზისის გადაჭრაა, წარმატებული იყოს", - ამბობს კუბილიუსი, - "მიშელის მცდელობის მხარდაჭერის მიზნით, პრეზიდენტმა სასოლიმ შემოგვთავაზა, შევქმნათ არაფორმალური საკონტაქტო ჯგუფი, რომელიც ევროპარლამენტის სხვადასხვა პოლიტიკური პარტიისა და სხვადასხვა დელეგაციის წარმომადგენლების მონაწილეობით, იმისთვის, რომ ხელი შევუწყოთ ამ კრიზისის გადაჭრას" ,- განაცხადა კუბილიუსმა "ფორმულასთან".